Cancion Gospel nobo di Vivienne Gomez-Rivadeneira: Na aña 2014, mi a skirbi e letranan di un cancion, a base di temponan dificil cu nos ta pasa aden. Anto despues di 6 aña, a yega e momento pa lansa e cancion aki.
https://www.facebook.com/masnoticia/videos/1475346862663209
Un cantica, den forma di un storia cu ta un refleho di nos bida. E contenido di e cancion ta a base di e texto caminda Hesus a bai den boto cu Su apostelnan y diripiente a lanta un mal tempo. Hesus a pega soño, mientras cu e apostelnan a pensa cu nan lo muri riba lama. Mi ta invita bo, lesa e texto aki of scucha e cancion nobo aki, cu lo anima bo pa invita Hesus den bo bida, pa e tuma control y calma cualkier tempestad cu bo por ta pasa aden awor. Den e pandemia aki, hopi di nos a pasa y ta pasando ainda den temponan dificil.
Nos pueblo tin mester mas y mas di musica cu ta duna forsa y cu ta anima cada un di nos, pa duna Hesus un lugar sepcial den nos bida. Mi tin pleno confiansa cu e cancion aki, lo yuda hopi hende, pa yama riba e nomber riba tur otro nomber, cu ta e nomber di Hesus.
Mi ta conta cu bo apoyo, como locutor of miembro di prensa; cu ta hunga un rol importante den nos comunidad. Mi ta anima bo pa comparti cu bo oyentenan e cancion aki, bendiciona nan bida y bo tambe lo ricibi e paz y goso di Señor. Keda pendiente pa e video-clip cu lo mi lansa riba mi Facebook-page. Na Curacao y Boneiro tin varios cancion cu mi persona ta canta, cu ta masha gusta, manera: Forsa di oracion y Tene mi man, pa menciona algun.