Den fin di siman a tuma luga un reunion den preparacion pa cu Dialogo Tripartite Social y Laboral, caminda cu gremionan di trahadonan, gremionan di dunadonan di trabao y gobierno a bin hunto. Presente na e reunion aki tabata t’ey, Sra. mr. Evelyn Wever- Croes, Prome Minister di Aruba. E tabata den representacion di Minister Glenbert Croes, cu tabata den exterior.
Sra. Wever- Croes a cuminsa na bisa cu tin biaha no kier uza dialogo social, nacional, ya cu no nan no kier bay bek. Tur partido ta sinti cu su vision ta wordo presenta den dje. Principalmente, pa evita cualkier desapunto den pasado no bin bek ariba mesa.
Ta di lamente cu e vision di gobierno no por a wordo ehecuta durante nan prome aña di gobernacion. Nan tabata mas bezig ta paga candela, atende cu problema financiero, y purba na mantene cabes ariba awa y na mes momento gobierno tabata atende cu CAFt, cu Hulanda. Pa tin palabracion. Cu tin palabracionnan cu Hulanda awo, pero esey no kiermen cu e ta facil. Situacion financiero di gobierno ta dificil. Pero tin un plan y mester mantene na e plan aki. Awo tin tempo pa structura tur e otro areanan. A cuminsa pone fundeshi pero no ta asina leu ainda.
E importancia di e dialogo tripartite ta pa evita pa gobierno tuma decisionnan unilateralmente sin consulta suficiente cu tur e gremionan. Esey ta un riesgo real. Ta purba evita cu esaki pasa den decisionnan grandi sin consulta. Ora di pensa ariba reforma fiscal cu ta algo grandi cu mester bin ainda. Loke a bin caba ta cosnan chikito.
Ora di pensa ariba vision economico, e minister di Finanzas, Economia y Cultura, ta bezig cu esaki. Ta pensa den e direccion aki, cu gremionan ta wordo skucha. Crecemento economico tambe ta den e metanan, pero e meta ta pa e cfrecemento economico mester bin cu cuponan empleo. Esey ta bay pa dunadonan di trabao. Ta pa semper tin un mecanismo (permanente) di consulta y e minister di Asuntonan Social tin su hendenan institui pa cu esaki. Ta temporada nobo pa gobierno tambe, pero e team di Ministre di Asuntonan Social ta e prome punto di contacto entre gobierno y minister ta bin aden ora di tumamento di decision, ora di conflicto y ora e minister ta bin aden. Pa evita cu esaki escala.
Den vision id gobierno ta pa hancra e tipo di diaolognan aki den ley. Pero mester wak si e ta funciona, y despues ancra esaki den ley. E ora tur minister mester tene su mes na dje. Na Hulanda tin e Stichting van Arbeid, un fundacion unda e doño di trabao y e trahadonan ta representa den dje y hunto ta tuma un posicion pa dialoga cu gobierno.
Gobierno a ricibi cartanan di sindicatonan di 19 di december, y no por a atende cu esaki cuné di biaha. Minsiter di Asuntonan Social y Labor lo atende cu esaki na final di luna. Algun puntonan di e carta ta asuntonan serio. Ta papia di derechonan fundamental cu no por wordo trapa di nan. Ta cosnan fundamental. Y e minister Glenbert Croes ta trahando ariba esaki.
E prome contacto cu sindicato ta cu Minister di Labor. Y e departamentonan estatal cu ta cay bou di Minister Evelyn Wever- Croes, si ta diferente. Lo bay tin diferente contactonan cu esakinan ora ta necesario. Pero en general ta bay asina manera ya menciona.
Venezuela ta ariba agenda constante. E no ta facil ya cu e ta un situacion ayanan cu niun hende no sa kico ta pasando. E ta un situacion unda cu tur hende mester ta prepara y reacciona. E tin hendenan nervioso. Informacion ta vital. Pero net esaki ta fastioso, ya cu nun hende sa kico Merca of Venezuela ta planea. Esey ta un reto grandi.
Retonan financiero ta grandi pa tene cuenta cu nan. Tin palabracionnan nobo cu Hulanda. Pero esey no kiermen cu e ta facil. E teman di refineria cu semper a keda preocupante. E sancionnan di Merca ta afecta e refineria mas di loke el a afecta caba. E ta bira preocupante minrado cu ta trata di cuponan di trabao.
E situacion social ta purba di atende mas miho cun’e posibel. Gobierno a pone 18 miyon florin disponibel pa cu esaki. Problemanan social ta hopi grandi. Problemanan social ta cu tempo ta soluciona esaki.
Criminalidad y siguridad di nos isla ta preocupante. A tuma luga un caso di violacion ariba nos beachnan y esaki lo atende cu e Minister di Husticia, minister di Turismo, hunto cu demas instancianan. Y cu e situacion di Venezuela, e ta pone mas presion.
Areanan di Salubridad y Enseñansa tambe tin su preocupacionnan, unda cu lo atende cu esakinan. Cu poco placa, mester haci milager. Sra. Wever- Croes a gradici e gremionan, cu ta para pa loke nan ta kere den dje. Pa un pais por ta exitoso, sector laboral mester funciona bon, comerciantenan mester funciona bon y gobierno mester funciona den colaboracion cu tur tres.