Jesus Guacaran a wordo tira mata diaranson pa personanan desconoci, sin bisa un palabra y tampoco nan no a bay cu nada di dje.
E fisioterapeuta di e seleccion di futbol di Venezuela, Jesus Guacaran, a wordo asesina diaranson. E suceso ta amplai e saga di violencia den e pais Suramericano.
“Cu profundo dolor nos ta lamenta e teribel asesinato di nos amigo Jesus Guacaran, na man di delicuentenan”, e club Deportivo Lara a señala riba su cuenta di Twitter. Guacaran tabata e fisioterapista fisico entre 2012 y 2013.
E terapista, cu a forma parti di e seleccion Sub 20 cu a logra e titulo di subcampeon mundial na 2017, no a wordo horta y tur su pertenencianan a keda banda di e curpa. e informe ta bisa. E crimen a wordo repudia pa e tecnico di Vinotinto, Rafael Dudamel y pa varios hungado, manera Tomas Rincon y Salomon Rondon.
“No tin manera di expresa e tristeza inmenso cu ta invadi nos. Un ser humano unico a wordo ranca for di nos. Bo famia di Vinotinto lo haya bo falta pa semper”, Dudamel a scirbi ariba su cuenta di Twitter.
Rincon, delantero di Torino di Italia, a expresa “indignacion” ya cu “un paar di delincuente ta caba cu bida di un gran ser humano”. Rondon, delantero di West Bromwich di Inglaterra, a manifesta “impotencia”, pa motibo cu na su pais “e bida di un ser humano no ta bal nada”.
Deporte Venezolano den e ultimo añanan a wordo sacudi pa varios hecho di violencia, incluyendo e presunto secuestro di dos siman pasa di e futbolista profesional Maikol Vivas, kende a reaparece dos dia despues. Na november ultimo, e beisbolista Javier Betancourt, un hoben beisbolista cu futuro prometedor di Milwaukee Brewers, a wordo herida di bala den su brasa robes, despues di a discuti cu’n desconoci na Caracas.
Un otro Big Leaguer, Elias Diaz, dia 8 di februari, a sufri e secuestro di su mama, libera dos dia despues. Na 2011, e pelotero Winston Ramos, e tempo ey hungado di Washington Nationals y actualmente hungando cu Tampa Bay Rays, a wordo rescata y e responsabelnan di su secuestro a wordo condena na 20 aña cada uno.
Venezuela ta wordo considera un di e paisnan mas insigur na mundo, cu un total di 89 asesinato pa cada 100 mil habitante na 2017 (26 mil caso). Esaki ta 14 biaha mas hopi cu e promedio mundial, segun e NGO Observatorio Venezolano de Violencia.
Fuente:https://redgol.cl