Fundacion Hende Muhe Den Dificultad ta mantene nan punto di bista. Nan ta contra di violencia domestico, sea e ta contra di hende homber of e hende muhe, of e muchanan. Sra. Magaly Maduro, di Fundacion Hende Muhe den Dificultad ta amplia mas ariba esaki.
Esaki ta sin importa si tabata tin influencia di alcohol of droga, of loke sea, esey ta no excuus pa violencia entre pareha. Como fundacion nan ta lo keda conscientisa e pueblo cu esaki no ta bon. Fundacion Hende Muhe den Dificultad ta haci esaki door di haci charlanan, door di bay scolnan, via nan Facebook Page, testimonionan cu ta wordo poni ariba nan pagina. Ora nan bay scolnan, nan ta papia di esaki, purba na conscientisa e hobennan, cu violencia no ta e manera pa resolve problema.
Na augustus tabata tin Sra. Tromp cu a fayece y awo ta Sra. Wouter cu a fayece door di violencia, cual ta algo masha di lamenta. Nan ta spera cu den futuro esaki lo ta menos. Den caso di Sra. Tromp, nunca el a bin e fundacion. Y esaki tampoco ta e caso cu Sra. Wouter y esey ta loke fundacion ta lamenta. Loke nan ta lamenta ta cu e ambulantenan a crece, nan tin mas cu aña pasa. Esaki kiermen cu nan a haya caminda pa fundacion, nan sa unda pa haya ayudo. Fuera di esey Sra. Maduro ta haya hopi yamada telefonico of via Facebook Messenger, di hendenan cu ta busca informacion. Ta purba di traha un manera pa sali for di un relacion toxico.
RELACION AUTORIDADNAN
Pa loke ta Cuerpo Policial y Departamento di Asuntonan Social, e relacion cu e institucionnan aki a mehora. Nan tin hopi bon contacto cu Departamento di Asuntonan Social, fundacion por verwijs nan na DAS, tambe cu Slachtoffer Hulp y e fundacion lo haya mas unit pa nan por amplia nan luga den shelter, pasobra cu e necesidad pa opvang ta mas grandi cu loke a spera.
Fundacion Hende Muhe den Dificultad ta spera cu pa fin di aña nan tin dos unit nobo y pa aki 6 luna, lo tin 10 mas. Y e ora ta yega na loke via e Tratadonan Internacional cu ta cuadra cu pa cada 10 mil habitante mester tin un unit den e shelter. Y e ora ey ta yega 120 mil mester tin 12 unit, cu ta e cantidad necesario.
BEK DEN SOCIEDAD
Sra. Maduro a splica cu mayoria di nan clientenan cu a keda cu nan den shelter, nan bida ta cambia y nan ta para ariba nan mesun pia. Esunnan ambulante ainda no ta tur ora ta cla pa sali for di e situacion, pero si nan ta traha, cu si nan keda den e relacion ey mes, pa nan ta consciente di kico nan ta haciendo. Ta traha ariba e importancia pa nan realisa cu un mucha cu lanta den un ambiente asina ey, no ta bon y e ora e fundacion mester meld e situacion na Bureau Sostenemi. E mayor no ta bezig ta proteha e yiunan, pero ta expone nan na situacionnan peligroso. Si e mayor no por cuida e mucha, fundacion por haci melding di esey.
DEPENDENCIA
Hopi biaha un hende muhe ta dependiente di un hende homber pa mantene nan , pa cual Sra. Magaly Maduro a splica cu e fundacion ta trahando cu diferente grupo cu ta dispuesto pa duna training. E aña aki e fundacion a haya dos instancia cu a acerca e fundacion pa yuda e hendenan cu desaroyo propio, cu si nan tin interes den cierto area pa traha, cu nan ta yuda con pa solicita. Fuera nan ta haci cursonan na Enseñansa pa Empleo. Si nan tin interes pa traha, nan ta haya guia y estudio. Tambe cu tin cuponan di trabao, pero ta e persona interesa mester bay. E persona ta wordo siña con pa regla nan bida. Si tin yiu chikito, ta siñanan con pa anda cu budget, pa paga creche y sobrevivi. Pero semper ta keda cu clientenan cu ta purba yudanan, pero cu nan mes no ta cla pa yuda nan mes. Eynan ta di warda e tempo yega cu nan por yuda nan mes, y ta spera cu no ta mucho laat.
RESIDENCIAL
Momento cu un persona drenta residencial na Fundacion, di biaha ta cuminsa cu e Hulpverlenings Plan, di kico e persona kier logra. Ta e intencion pa e persona mes sa kico e kier, nan ta wordo guia den e proceso di con pa logra nan metanan, segun Sra. Magaly Maduro, di Fundacion Hende Muhe den Dificultad.