Riba e website http://digitalebuurtwacht.nl/, por a mira algun informacion super interesante con pa combati criminalidad den bo bario, protehando asina bo cas, bo auto y tur loke bo a traha duro pe.
Di e manera aki bo por haci un bon uzo di e aplicacion di celular di mas popular te awor aki, whatsapp, pa por mantene contacto entre bisiñanan pa comportacion y/of situacionnan sospechoso.
E sistema aki ta wordo uza caba na Hulanda y e ta proba cu den barionan cu tin un cantidad di 50% di ladronicia a baha. Pesey mes e gemeentenan y polis ta aplaudi e neighbourhoodwatch digital.
Segun e website, lo ta hopi bon pa cuminsa cu un vigilancia den bario digital riba whatsapp y asina contribui na e vigilancia di bo bario.
Y si mira bon, e no ta un mal idea pa aplica esaki na nos isla, pasobra den e sociedad cu nos ta bibando aden y e criminal cu ta bezig ta azotando nos isla, nos mester tur medio posibel pa nos mes preveni cu nos ta bira victima di criminalidad. Nos no mester sinta warda pa polis of otro autoridadnan haci algo. Nos por cuminsa nos mes. Corda bon, mas wowo ta nifica mas vigilancia. Yuda spanta criminalnan pa nan no drenta cas di ningun hende mas.
Con pa cuminsa
Manera tur proceso, esaki ta bay paso a paso.
Paso 1: Crea un grupo riba whatsapp
E administrador of manehador ta traha un grupo riba Whatsapp. Un nomber como sugerencia por yama por ehempel “Bariowatch Companashi” (djis pone e nomber di bo bario uzando esaki como un ehempel).
Paso 2: Informa e bisiñanan y invita nan.
Invita bo bisiñanan, polis di bario via un carta (por ehempel un carta den nomber di e bisiñanan). Un grupo riba app ta limita na 100 participante, dus no haci e grupo mucho grandi.
Paso 3: Agrega participantenan
Como administrador di e grupo, bo por pone notificacionnan na e grupo. Participantenan si nan kier por laga e grupo, pues ningun hende ta mara na dje.
Paso 4: Plak sticker na bo bentananan
No laga e neighbourhood watch bay sin ta opvallend; pone sticker na bentana y pone borchinan di advertencia.
Reglanan di wega:
1. Meld situacionnan cu ta sospechoso of tin di haber cu siguridad.
2. Hiba un combersacion cu e persona sospechoso, eventualmente despues cu a meld den e grupo.
3. Informa e grupo si bo a yama 911 of 100.
4. Manda potret di e persona sospechoso solamente pa informa di e descripcion.
5. Tene cuenta cu uzo di lenguahe: No insulta ni discrimina.
6. Envolvi mas tanto posibel e otro bisiñanan cu no ta participando den e grupo riba whatsapp.
7. No hunga pa hues.
8. Uza solamente e neighbourhood watch digital solamente pa su meta. Vigila e bario.
9. Palabra eventualmente e reglanan di wega cu e otro participantenan.
Tin otro tipo di vigilancia den bario. Esaki ta simplemente un di nan cu bo por haci uzo di cierto facilidadnan na man, cu por yuda preveni criminalidad rond dibo y bo sernan stima.
Fuente: http://digitalebuurtwacht.nl/