HOUSTON, Texas – Abogado di un famia di un homber kende a fayece despues di un confrontacion cu casa di un agente policial di Harris County, pafo di un restaurant, a bisa cu un video cu a keda divulga dialuna, ta mustra un “yabi ilegal” (chokehold) cu a wordo uza pa por a domina e homber.
Di acuerdo cu vocero di e oficina di Sheriff di Harris County, e casa di e agente kende tabata off, a yega na e restaurant riba e anochi di dia 28 di Mei cu su yiunan y a mira John Hernandez urinando pafo di e restaurant. E oficina di Sheriff a bisa cu e casa a bay confronta Hernandez riba su comportacion y eynan e pelea a cuminsa.
Hernandez a wordo hospitalisa despues di e confrontacion. El a fayece tres dia despues cu a kita e soporte vital for di dje.
Abogado Jack Carroll a bisa cu e video a yega na dje door di un ciudadano preocupa. Carroll awo ta representa e homber, kende ta desea di keda anonimo. El a bisa cu e video ta mustra e casa di e agente drumi riba Hernandez mientras cu e ultimo tabata lucha pa hala rosea.
“Basicamente bo ta wak e homber ta wordo mata,” Carroll a bisa. “E tabata scop su pianan den un manera y bo por a scuch’e ta choca, simplemente ta pidi pa stop. “Stop” e hendenan patras y famianan tabata bisa…”
E abogado di e famia a bisa cu e video ta mustra un crimen di homicidio involuntario a wordo cometi.
“E ta parce di ta un homicidio involuntario si no ta un asesinato,” Randall Kallinen, e abogado di famia Hernandez a bisa. “Pasobra e ta parce cu e homber tabata tin’e den un chokehold y tabata chok’e, y eventualmente esey a mat’e.”
Nan ta bisa cu e video ta mustra varios hende ta demanda e ciudadano pa stop e grabacion y cu e ciudadano hasta a wordo menasa cu aresto si e no grabacion no ta stop.
Sheriff di Harris County, Ed Gonzalez a bisa diabierna cu el a wordo pidi pa e asistencia di Texas Rangers y e departamento di Husticia den e investigacion di e morto di Hernandez. Oficialnan di e oficina di Sheriff a bisa cu nan abata sa di e video. Te na e fecha, ningun hende no a wordo culpa cu e crimen en conexion cu e morto di Hernandez.
E Oficina di Sheriff di Harris County a saca e siguiente declaracion riba e video cu a sali dialuna:
“E investigadornan di e oficina di Sheriff di Harris County, ta conciente di e video cu a sali na luz publico awe. E investigacion den e morto di John Hernandez ta keda un prioridad halto y lo wordo referi na e Oficina di e Fiscal di Harris County pa consideracion propicio.”
Miembronan di famia y activistanan den e comunidad a tene un marcha diabierna pa pidi pa husticia den e caso.
“Kico lo hacibo pa silencia un bida? Eynan mester tin realmente odio of rabia,” Cynthia Cole, director ehecutivo di e American Federation of State, County and Municipal Employees of Texas a bisa.
Otro lidernan di comunidad tabata tin un problema cu e aparente censura den e video. “Bo por bisa for di e video cu nos a wak, cu nan ta bisa hende pa stop di filma,” Augustin Pinedo, un representante di derechonan civil di e Liga di Ciudadanonan Latino Americano Uni a bisa.
Kallinen a bisa cu e video den e caso aki ta perfectamente bon. Cole a bisa cu e video ta crucial.
“Mi ta kere cu mester tin respet pa privacidad, pero si no tabata tin un video, unda nos lo ta awe?” Cole a bisa.
Fuente: www.click2houston.com