Un investigacion di specialista di e Hospital Universitario di Bonn (Alemania) a conclui cu hunga un video game den 3D “Super Mario Odyssey” ta provoca un reduccion significativo di e sintomanan di trastorno depresivo mayor (TDM).
E expertonan ta splica cu e pashentnan cu TDM hopi biaha ta experencia un reduccion di e efecto, di e estado di animo y deterioro cognitivo, manera problema di memoria.
Desaroyo di e estudio
Den e experimento a participa 46 persona diagnostica cu depresion cu a informa di ta hunga video games cu poco frecuencia den nan tempo liber. Esakinan a wordo dividi den tres grupo diferente di estudio.
E investigadonan a compara e efectonan di hunga “Super Mario Odyssey” durante seis siman riba un console di Nintendo Switch cu e efectonan di un programa di entrenamento cognitivo “CogPack” y cu esunnan di tratamento clinico normal p’e trastorno aki, cu ta inclui medicamento y psicoterapia.
Analisis di e resultadonan
E participantenan cu a hunga “Super Mario Odyssey” a mustra mehora significativo den e estado di animo deprimi, e motivacion di e entrenamento y e funcionnan di e memoria visoespacial. E desempeñonan aki tabata superior n’ resultadonan obteni p’e participantenan cu a ricibi e otro tratamentonan, e autornan di e estudio a destaca, publica recientemente den Frontiers in Psychiatry..
E cientificonan a señala den nan informe cu e resultadonan “a indica cu e entrenamento cu video games por ta un intervencion rendabel y factibel p’e pashentnan cu TDM cu por uza hunto cu e tratamento y e terapia normal.”
Limitacion di estudio
Sinembargo, e propio autornan a reconoce algun limitacion di nan investigacion, ya cu no a trata di un estudio ciego (e participantenan tabata conoce e grupo asigna y probablemente por a interveni e enfoke di e investigacion), loke por a afecta e resultadonan y impacta negativamente den e resultadonan estadistico. Fuera di esey, nan a adverti cu e tamaño di e muestra tabata chikito, loke por limita e generalisacion di e hallazgonan.
Di e manera aki nan a indica cu ta posibel cu e duracion di e periodonan di entrenamento no tabata suficientemente largo pa conclui si e video games ta un terapia eficaz p’e tratamento di depresion a largo plaso. Cu tur esaki, ta mustra cu “mester tene cautela na ora di generalisa e resultadonan.”
