CARACAS, Venezuela – E casa di e lider opositor Venezolano, Leopoldo Lopez, a reacciona awe mainta atrabes di su cuenta di Twitter riba e video cu Diosdado Cabello a presenta diaranson, como prueba di bida di su casa.
Tintori a bisa cu e video presenta ta falso y e unico fe di bida cu e lo acepta, ta pa mira Lopez.
El a añadi den un serie di tweets caminda cu por mir’e y e mama di Lopez dilati un grupo di miembro di Guardia Nacional Bolivariana, cu ta na e prizon Ramo Verde, unda cu Lopez ta cera, exigiendo pa nan wak’e.
Na Venezuela tin un escenario compleho di rumor unda cu e Gobierno a caba na presenta, den e programa di Diosdado Cabello, un video cu ta bisa ta un prueba di bida di e lider opositor preso, Leopoldo Lopez.
Den e video, Lopez ta sigura cu el a wordo graba diaranson, 3 di Mei, den su cel di Ramo Verde. Esaki a sosode, pasobra mas tempran a circula varios tweet cu tabata cuestiona e estado di salud di e lider opositor. Specificamente un periodista a reporta e supuesto traslado di e opositor na un hospital, pasobra “e tabata sin signonan vital door di intoxicacion.”
Despues a bin haya sa cu Liliana Tintori, casa di Lopez, a bay pa e hospital militar, purbando pa haya informacion.
Ademas, e senador Mericano, Marco Rubio a bisa di tin confirma cu Leopoldo Lopez a wordo traslada na un hospital den condicion grave.
Na final, Cabello a presenta e imagennan di e lider opositor como un prueba cu e Gobiern di Nicolas Maduro ta wordo ataca pa “un conspiracion di derecha mundial.”
Na September di 2015, Leopoldo Lopez a wordo haya culpabel di e delitonan di instigacion publico, asociacion pa delinquir y determinador den daño y incendio den relacion na e hechonan di violencia desata tras un manifestacion opositor na Februari di 2014, cu a laga un saldo di 43 morto.
Lopez a wordo condena na mas di 13 aña di prizon.
Fuente: CNN en Español