VATICANO – Algun di e victimanan di abuso di parti di pastoornan a manifesta nan indignacion y decepcion pa palabranan di papa Fransisco despues di e cumbre cu a tuma luga na Vaticano. Nan ta considera cu no tin medidanan concreto sino solamente palabracionnan, EFE a señala.
E Spaño Miguel Hurtado, cu den pasado a denuncia abusonan sexual di parti di un monhe di e monasterio di Montserrat y un di e voceronan di e Organisacion Global di Victimanan (ECA), a afirma cu awe e palabranan di papa Fransisco tabata manera un “bofta”.
“Awe papa Fransisco a pasa tur e victimanan di pedofilia di tur e 5 continentenan cu a yega Roma pa exigi un splicacion, un bofta”, e psikiatra y activista a bisa despues di e discurso di Fransisco.
Hurtado a denuncia cu e mita di e discuro di e pontifice tabata dedica na e “abusonan cometi afo di Iglesia”.
“Nos a wordo abusa dentro di Iglesia, pa pastoornan catolico, monhenan y docentenan Catolico. Nos tabata sperando un contesta cu e papa no a duna nos”, el a sigui bisa.
Hurtado ta di opinion cu si e pontifice a ricibi e miembronan di e asociación di victimanan e lo no a haci un discurso asina lamentabel.
Hopi ta considera cu e “campaña di tolerancia cero anuncia pa Vaticano a bira un credibilidad di cero”.