Giovanni Helder ta un tata hoben cu a haya su mes envolvi den un problema cu en realidad e no tabata tin nada di haber cun’e. El a conta cu nan a caba di wak Carnaval y nan a bira bay direccion cas, pasobra esey tabata regla. Despues di Carnaval tur hende mester move for di ruta y coy caminda pa cas.
Esey ta loke nan a haci tambe. Bay cas pa bay sinta chill y sigui have fun. Den esey a bira wak dos homber bringando, pero no a worry. Esey tabata dilanti su porta di cas. Ora cu a realisa, ta dos conoci di nan, cu tabata bringando. No por a laga nan bringa eynan, pa e cos bira grandi, polis bin y plama tur hende sin mester. Giovanni y su ruman a hala e bringadonan for di otro pa problema stop.
Den un di esey, un di e hendenan cu tabata cu nan a spanta, y a yama polis. Ora cu polis a yega, no tabata tin ningun problema mas. Tur dos bringado tabata full separa for di otro, uno otro banda y e otro paden di cas, pa nan no tin contacto cu otro.
Loke a pasa ta cu manera polis a yega, esun cu tabata pafo, a bisa cu e otro ta arma y cu e lo arm’e, haciendo un problema sin tin mester. Ora cu polis a drenta bay paden, Giovani no por a laga nan drenta zomaar, mirando cu su yiu chikito y su sobrinonan tabata den sala. E porta di cas ta estilo bieu, cu tin e glasnan los cu si pasa dal den dje, e glas ta sali cay, corta un di e muchanan sin tin mester, haci tur esey. Ora cu el a mira cu nan kier core drenta su cas, a bisa “Aldrick,” kende pa colmo ta un bringado profesional, el a acerk’e pa papia cun’e.
Pero el a bise pa e baha na awa. Ya cu el a papia fresco cun’e, el a exigie papel di fiscal. Su pensamento ta cu esey por tabata e rabia ora cu nan mester di un carta di fiscal pa por drenta su cas. Su reaccion ta pa bira dal’e, e otronan a bira subi riba dje mirando cu e tabata riba vloer. Ora cu el a dal’e, el a bay tera, pasobra e sa cu e ta bay wordo aresta ora cu el a dal’e. E tabata tin e agresividad caba. Helder a cay y e otronan a bula riba su nek y ya su man tabata patras.
El a laga nan areste. Pero asina mes un di e agentenan a keda riba dje, strobando e di hala rosea, dilanti su porta di cas. Logico cara pa su yiu, pasobra e ta den sala cu su sobrinonan mirando loke ta pasando. Den esey e ta wak con e ta dal e persona cu a bringa den e cas, Aldrick a drenta cu rabia. Asina mes cu el a entrega su mes, e agente a dal’e masha duro mes y el a bent’e riba vloer y detene. E muchanan a cuminsa yora den cas, pasobra nan a spanta. Nan a wak con nan a dal e persona masha duro mes. Helder tabata pafo riba su barica y no por a hala rosea bon. E agente ta keda bise pa stop di resisti y tabata dal’e cu na su cabes patras y cu elleboog.
Su brother como testigo nan si a logra wak, te cu a bisa e agente, cu nan ta abusando y e tabata na boei. Tabata tin e otro bisiña cu tabata bisa nan pa stop di dal e homber na boei. Nan a keda dal Helder na boei, lag’e na werki. Sin tin mester, ciendo cu no tabata tin ningun problema andando. Ya e problema a caba.
E mancha cu e tabata tin na su cara ta e impacto di mokete di e agente Aldrick.
Prome cu el a dal e otro persona, el a pusha mama di Helder, un dama di 69 aña, cu ta sufri di sucu, presion halto. Tabata full un problema cu no tabata tin mester, siendo cu nan como polis sa mucho mas miho cu bo no por drenta propiedad di hende abusa asina ey. Tambe falta di comunicacion. Por ta nan tabata cansa of algo, pero esey no tabata e manera adecua cu nan mester a actua, drenta den cas di hende asina ey.
Na warda, Helder a puntra kico ta e paso cu e tin cu tuma. Nan a bise cu e tin cu haci loke e tin cu haci. Nan no lo bay bisa specificamente, mirando cu ta nan colega. Helder a sinti cu nan ta a want’e un tiki cu e informacionnan ey, pasobra con cu bay bin ta nan colega y ta perhudicando nan colega. E ora eynan a dicidi di cana nan propio caminda y bay BIZO y bay cerca abogado. Awor aki ta tur cos ta den man di abogado y wak kico e lo haci pa cana e caminda pa Helder, sin cu ta envolvi den e pelea.
A haya un multa di 1300 entre e y su ruman homber. Despues na final nan kiermen cu ta mucho hopi cu nan ta bay bah’e na 800, cual a bira bisa e momento ey cu no ta husto, pasobra con cu bay bin, nan a para e pelea y tin cu bay paga multa tambe. E ora kiermen, ta te eynan por haci’e y cu nan a rebahe pa 800. Locual cu ta dal Helder mas duro cu ora cu tur cos a pasa, e otro persona cu a bringa, tabata bon bin, sin wordo aresta, sin nada a pasa cun’e. Ni haya boet nada. E tabata bisa polis cu Helder y su ruman no tabata tin nada di haber.
Cu ta e y e otro persona a bringa. El a purba di splica kico ta pasando, cu ta hende robes nan tabata. E otro polis a bisa cu ta pa un otro caso nan a detene nan.
E maltrato di polis a haci cu e ta na cas. El a bay eerste hulp. El a sufri di nanishi kibra y tin golpi na su cara y tambe tras di su cabes. Awor aki Helder ta AO y no por bay traha asina eynan.