QUITO, Ecuador- Husticia di Ecuador dialuna a decreta prizon preventivo pa e vice presidente di e pais, Jorge Glas. Segun autoridadnan, Glas supuestamente ta envolvi den un caso di corupcion cu ta inclui e cobra di soborno di parti di e compania di construccion Odebrecht.
Despues cu e noticia a bira conoci, Glas, pa medio di su cuenta di Twitter a bisa di lo obedece e decision, aunke “bou di protesta”, pa motibo cu e ta un “inhusticia”.
“Sin prueba y cu sospechonan sin base. Nan falta solamente e linchamento. Mi lo acudi na instancianan internacional pa defende mi mes”, el a skirbi den otro tweet.
E detencion preventivo a wordo dicta door di e Corte Nacional di Husticia di e pais despues di a haya e solicitud di Ministerio Publico di uno hustifica.
Tambe nan a duna ordo pa freeze su cuentanan bancario. E medida ta conta tambe pa e omo di e vice presidente, Ricardo Rivera, pa un delito di asociacion ilicito.
Segun abogodo di Glas, su cliente a sigura cu e lo no renuncia na su cargo.
Glas ta wordo acusa di a ricibi soborno tambe rond di 16 miyon dollar di parti di e compania di construccion Brazilero Odebrecht.