Vicario Ellis ta bin for di St. Maarten y tabata e prome studiante regional pa gradua cu un Bachelor den “Social Work and Development” na Universidad di Aruba. E ceremonia a tuma lugar riba 9 di februari 2018. Su mayornan, rumannan y sernan keri a biaha for di St. Maarten pa celebra e ocasion significante na Aruba.
Gregory Richardson kende tabata Vicario su Research Coach a describi’e como un hoben resistente kende tin un interes profundo pa sigura cu tur hoben masculino keda den scol. Pa finalisa, el a scohe e topico: “Young Males and Females Jeopardizing their Future: A Case Study of Social Factors Affecting their Completion of Secondary Education in Aruba.”
Vicario a uza un metodo mixto na unda el a entrevista 61 mucha di scol entre e edad 16 – 18 aña y profesionalnan riba e tereno. E resultadonan di e investigacion a revela cu tin mas factornan cu ta ‘pusha’ compara cu esunnan cu ta ‘atrae’ responsabel pa drop out for di scol den e muestra di e muchanan di scol na Aruba. Algun di e factornan cu ta ‘pusha’ ta inclui e clima na scol, organisacion na scol, conflicto entre mucha y docente y suspension. Entrada di famia y e nivel di educacion di su mayornan tambe tabata factornan cu ta ‘pusha’.
E departamento di ’Social Work and Development’ kier extende su gratitut pa Angelique Perez di Sonrisa, Meredith Concincion di Foundation Judicial Institutes St. Maarten, Nastasia Verheijen di Stichting Wit Gele Kruis, Mayrene Ras- Croes y Geraldine Tromp di Maria College and Souxie Kock di Heart Centered Leadership Foundation kende a guia Vicario durante su pasantia.
Nos ta invita mas studiante for di St. Maarten, Saba, Bonaire y St. Eustatius pa uni na e programa ‘Social Work and Development’. Bishita e website di Universidad di Aruba: www.ua.aw pa mas informacion tocante e programa ‘Social Work and Development’ y sigui nos riba facebook University of Aruba-Social work & Development.