Niun hende no tabata sa di e abusonan sexual te ora cu e muhe a drenta den parto dia 29 di december ultimo. E ora a cuminsa cu e investigacionnan corespondiente.
Polis di Phoenix, Arizona a anuncia diaranson cu e verpleger Nathan Sutherland, di 36 aña a wordo aresta, y ta wordo acusa di violacion y di a saca un pashent den estado vegetal na estado. E pashent ta interna den e centro medico Hacienda Health Care ya pa 26 aña caba
E muhe a duna lus na un baby mucha homber dia 29 di december ultimo, y sorprendentemente, niun miembro di e hospital tabata sa cu e tabata na estado, te ora cu el a cuminsa keha y nursenan a bin descubri cu e ta cla pa haya yiu. Despues di esaki, polisnan a cuminsa un investigacion riba e supuesto abuso sexual.
For di e momento cu nos a haya sa di e delito, practicamente nos a bin ta traha shete dia pa siman, sin stop, riba e caso aki”, e hefe di polis local, Jeri Williams, a bisa ora cu el a anuncia e captura di e acusado, cu tabata traha den e centro desde 2011 y cu tabata esun responsabel pa e cuido di e victima.
Segun declaracionnan di autoridadnan, un prueba di DNA a revela cu Sutherland tabata e tata di e baby. E homber a wordo poni den custodia di polis y cera den e prizon di e condado di Maricopa. E ta enfrenta awo cargonan di agresion sexual y abuso di adultonan vulnerabel.
Den e transcurso di e proceso di investigacion, e director di e hospital a entrega su renuncia y dos dokter responsabel di atende cu e victima a wordo suspendi.
Sargento Tommy Thompson a precisa cu e verpleger, procedente di Haiti, no tin antecedentenan penal y despues di su aresto a nenga di responde na e preguntanan di e investigadonan. Ademas, el a señala cu e agentenan ainda ta trahando pa determina si Sutherland a agredi otro pashentnan den e centro hospitalario. El a traha eynan desde 2011 y a wordo kita for di trabao di biaha despues di cu a surgi acusacionnan di abuso sexual den su contra.
Masha poco ta conoci di e pashent, p.e. cu e ta pertenece na e Apachenan y cu e ta den e centro medico Hacienda HealthCare desde cu e tin 3 aña. A pesar di cu e informenan ta bisa cu e ta den un estado vegetativo, abogado di e famia ta afirma mas bien cu e tin un “discapacidad intelectual severo” pero cu e ta dispone di “cierto grado di consciencia”.
Den un comunicado, e hurista a splica cu e pashent no ta papia, pero cu e ta “capaz di responde na e famia cu expresionnan facial ora cu e ta den e camber”.