BONN, Alemania- Un broeder Aleman a admiti di ta e pio asesino en serie di e epoco post- guera di Alemania, despues di a mata 100 pashent cu inyeccion letal pa asina laga pasa cu e ta un heroe ora cu e purba reanimanan.
Ora cu e hues Sebastian Buehrmann a puntra Niels Hoegel, di 41 aña a puntra Niels Hoegele di 41 aña, si tur loke e ta wordo acusa di dje ta berdad, el a responde cu si y a agrega: “Tur loke mi a bisa y admiti, ta berdad”.
Hoegel a sconde su cara tras di un map di plastic blauw ora cu polis y su abogado a hib’e pa e sala di corte den e ciudad norteño di Oldenburg.
Ya caba el a wordo condena na 15 aña di prizon na 2015 despues di a wordo haya culpabel di a mata dos pashent cu inyeccionnan letal. Na januari, fiscal a presenta cargonan nobo den su contra pa e fayecimento di 97 persona mas.
Su admision no lo pone fin na e huicio, unda cu e famia di victimanan ta spera di haya mas informacion riba e crimennan cometi.
“Nos kier pa e haya e sentencia cu e merece”, Frank Brinkers a bisa. Brinkers su tata a muri pa un overdosis presuntamente administra pa Hoegel. “Ora cu e huicio yega su final, nos kier laga tur esaki atras y haya ‘closure’.
Fiscal di e ciudad di Oldenburg, noord di Alemania, a bisa cu e informe di e investigacion y toxicologia a mustra cu el a inyecta 35 persona den un clinica na Oldenburg y 62 den otro clinica na Delmenhorst cu remedi cu por matanan.
Dies aña pasa, un nurse Aleman a wordo condena na cadena perpetua pa a mata 28 pashent anciano. El a bisa di a suministra nan inyeccionnan letal ya cu e tabata sinti duele di nan.
Na Gran Britania, ta calcula cu Dr. Harold Shipman lo a asesina cerca di 250 persona, mayoria di nan muhenan di edad avansa y medio cu tabata su pashent. Conoci como ‘Dr. Death’. Na aña 2000 el a wordo sentencia na 15 cadena perpetua. El a comete suicidio den su cel na aña 2004.