CALIFORNIA, Merca- E red social a crea un pagina unda cu e persona por comproba si su cuenta a resulta entre esunnan afecta.
E red social Facebook a crea un portal cu ta permiti su usuarionan verifica si nan ta entre e mas o menos 30 miyon persona cu hackernan a accede na su cuenta entre 17 y 27 di september debi na vulnerabilidad den e codigo.
E pagina ta diseña pa internautanan preocupa pa su informacion personal, cu por a wordo comprometi durante e “hacking” masivo. E bishitantenan di e “centro di ayuda” cu a cuminsa e sesion na Facebook lo wak un mensahe riba e pagina indicando si su cuenta a wordo afecta pa e violacion di datonan.
“E privacidad y siguridad di e personanan ta increiblemente importante y nos ta lamenta cu esaki a sucede”, Facebook a scirbi den un comunicado.
Den un documento tambe a señala cu si e persona ta un di e victimanan di “hacking”, no tin necesidad di cambia password ya cu e red social a invalida e “token’ di acceso na casi 90 miyon cuenta cu a potencialmente a wordo afecta pa e vulnerabilidad.
Piratanan informatico a logra accede na e cuentanan di Facebook di mas o menos 30 miyon usuario usando e listanan di amigo pa horta “tokens” di acceso cu ta ekivalente na e clavenan digital, cualnan a mantene e personanan conecta na Facebook pa nan no mester di hinca su password cada biaha cu e uza e aplicacion.