Nos cu tabatin e placer di presencia e concierto di Vento do Norte bou direccion di Henk van Twillert algun aña pasa, ta corda cu nan a inclui como un ñapa na e programa e waltz “Abo So” di Padu del Caribe cu a pone nos tur para y canta. Evidentemente, e maestro van Twillert a ricibi e mensahe cu e publico Arubiano ta stima nos propio musica. E aña aki, pa nan gira di nos islanan Hulandes den Caribe, e programa ta inclui musica di Gerard Palm, Livio Hermans, Padu Del Caribe y Wim Statius Muller.
Vento do Norte ta un conhunto di musico Portugues hoben y talentoso cu ta combina un vision di musica di camara cu nan propio interpretacion. Nan repertorio normalmente ta consisti di adapcion di composicionnan clasico, soul music, musica melancolico di fado y e tononan mahestuoso di tango. Nan programa Alma Azul ta inclui musica di Aruba y Corsou.
E grupo ta toca tur cos di memoria. Pa nan, e tocamento di saxofon ta union di nan emocion. Nan programa di e gira pa nos region, yama Alma Azul, ta inclui musica pa satisface tur gusto.
Di e obra West Side Story di Leonard Bernstein nan a inclui Maria, America y One Hand One Heart. Di Samuel Barber y Tomaso Albinoni e grupo lo toca nan Adagio. El Diablo Suelto di e Venezolano Heraclio Fernandez y cuater tango di e Argentino Astor Piazzola ta representa e musica Latino Americano.
Contribucionnan clasico ta inspiracionnan di Brahms, Bach y Gounod. Vento do Norte, como conhunto di Portugal, no por laga di inclui algun fado den nan programa. Nan lo toca Fado Nem as Paredes di e inolvidabel Amalia Rodrigues y Fado Azul di Tjako van Schie. Van Schie ta un musico eminente Hulandes cu ta colabora regularmente cu Vento do Norte.
Entre e piesanan di jazz riba e programa tin Petit Fleur di Sydney Bechet, un di e gran saxofonistanan di Merca; Stormy Weather di Harold Arlen y Ted Koehler cu Ethel Waters a graba pa prome bes na 1933. Otro piesanan di jazz ta Tico Tico di Paco de Lucia, I feel good di James Brown y Moonlight Serenade di Glen Miller.
Pa esnan cu ta anhela pa scucha e saxofonistanan interpreta musica di nos region, Vento do Norte a inclui e siguiente composicionnan: Um Sueño em Re minor di Gerard Palm, Pavane para Giuomar di Livio Hermans, Abo So y Atardi di Padu del Caribe y Despedida di Wim Statius Muller.
E lista di e piesanan aki riba no ta necesariamente den e secuencia cu e grupo lo toca nan.
Na e concierto lo tin e programa completo.
E concierto lo tuma luga na Cas di Cultura di 20 di Mei cuminsando pa 8or di anochi. Entrada en general ta 45 florin. (Obtenibel na De Wit & van Dorp Stores, Plaza Bookshop y na porta prome cu concierto). Miembronan di Kunstkring ta paga Fls. 40 na porta y muchanan Fls 15, tambe na porta. Mi ta spera di mira bo na Cas di Cultura dia 20!
Arubaaanse Kunstkring ta hopi gradicido na Manchebo Beach Resort, Consulado di Israel y De Wit & van Dorp pa nan patrocinio.
Skirbi pa Clyde Harms