Gobierno di Venezuela y e compania Hulandes Fondel Metals & Minerals BV diahuebs ultimo a firma un MOU pa e recuperacion di 5 mil ton di nikel den e dump Loma de Niquel, den estado Aragua.
E firma di e negociacion a wordo realisa pa e minister di Poder Popular pa Desaroyo Minero Ecologico, Victor Cano y Austin van ‘t. Wout, director di e compania minero di Hulanda.
“E dump aki ta un pasivo ambiental presente den e mina CVM Loma de Niquel, cu lo wordo trata cu’n tecnologia desaroya pa e compania Fondel di Hulanda, den cooperacion cu e Universidad di Delft”, Cano a comenta.
Cu e trabao conhunto entre Fondel y e Corporacion Venezolano di Minera, lo por saca productonan cu lo impulsa e economia nacional.
“Nos lo instala un planta di procesamento cu lo permiti recobra un porcentahe halto di nikkel cu cu lo wordo cotiza door di e programa Venezuela Exporta y ademas, nos lo tin mescla nan cu lo wordo uza den obranan publico di e pais”, asina e minister pa Desarrollo Minero Ecologico a afirma.
Di otro banda, Austin van ‘t Wout, a expresa su satisfaccion pa e acuerdo aki pa explotacion di nikel di CVM. “E acuerdo aki cu e Ministerio di Desarrollo Minero Ecologico di Venezuela y nos compania ta representa un proyecto clave, pa fortalece e cooperacion tecnologico y minero di nos paisnan”.
E firma di MOU ta parti di e politica minero implementa pa e gobierno Bolivariano, como parti di e Agenda Economico Bolivariano pa desaroya un modelo economico productivo postpetrolero.