CARACAS/BRUSELAS – Si e presidente Venezolano Maduro no convoca eleccionnan pa dentro di ocho dia, Francia, Spaña, Alemania y Gran Britania lo ta dispuesto pa reconoce e lider opositor, Juan Guaido como e hefe di estado di e pais Suramericano, cu ta den ruina. Esaki a wordo anuncia door di e cuater paisnan awe. Pero Venezuela no tin pensa di duna oido na e ultimatum.
“Europa ta duna nos ocho dia”, e minister di Relacionnan Exterior, Jorge Arreaza a bisa diasabra den un reunion di e Conseho di Siguridad di ONU. “Unda boso ta kere cu boso tin e poder pa duna ultimatum na un pais soberano. Esaki ta casi cos mucha chikito”.
Conseho di Siguridad diasabra a reuni ariba peticion Merca, despues di cu Washington y un grupo di paisnan den region a reconoce Guaido como e president di e pais y a urgi Nicolas Maduro pa entrega su renuncia.
Hulanda
Hulanda ta dispuesto pa reconoce Juan Guaido como president di Venezuela si no tin eleccion den e proximo ocho dianan. Esaki segun minister Stef Blok di Relacionnan Exterior a bisa den un carta na Tweede Kamer. Cu e posicion aki Hulanda ta uni su mes na e.o. Francia, Spaña, Alemania y Gran Britania.
“Al menos cu dentro di ocho dia bin eleccionnan nobo, nos ta cla pa reconoce @jguaido como ‘presidente di Venezuela’ pa asina duna inicio na un proceso politico”, president Frances, Emmanuel Macron a skirbi ariba Twitter.
Premier Spaño Pedro Sanchez a anuncia e mesun cos. Vocero di gobierno Aleman a bisa ariba Twitter: “Si dentro di ocho dia no bin eleccionnan nobo, nos ta dispuesto pa reconoce Juan Guaido como president interino, cu lo por cuminsa cu’n proceso politico hunto cu partnernan Europeo”. Minister Britanico pa Relacionnan Exterior a uni su mes na esaki. ,,@jguaido ta e persona ideal pa yuda Venezuela bay dilanti”, Jeremy Hunt a bisa den un tweet.
Union Europeo diahuebs a bisa di lo apoya e parlamento guia door di Guaido. Esaki diaranson a proclama su mes president interino durante protestanan masal.
Ehercito
E president Venezolano Nicolas Maduro a papia di un golpe di estado di parti di oposicion. “Esaki tambe nos lo gana, nos lo Sali triunfante”, el a bisa na su simpatisantenan dilanti e Palacio di Miraflores den e capital Caracas. E hefe di estado socialista aña pasa durante un controvertido eleccion a haya un di dos termino di seis aña. El a haci apelacion ariba e ehercito pa cuida e ‘unidad y disciplina’ den su pais.
Union Europeo
Federica Mogherini, hefe di politica exterior di UE, diasabra a haci un apelacion pa bin cu eleccionnan liber, transparente y creibel pa asina bin cu’n gobierno cu di berdad ta representa e boluntad di e ciudadano.
“Pa falta di un anuncia tocante e convocacion di eleccionnan nobo cu e garantianan necesario den e dianan nos dilanti, UE lo tuma e medidanan cu ta necesario, e.o. relaciona cu e reconocimento di e lider di e pais segun articulo 233 di e constitucion Venezolano”, Mogherini a bisa den un declaracion.