E minister di Defensa Venezolano, Vladimir Padrino Lopez, a afirma riba su rednan social cu su pais lo keda “den alerta” n’e plannan di Reino Uni cu a manda un bapor patruyero dilanti di e costanan di Guyana, ex-colonia Britanico.
Diadomingo, London a anuncia e intencion pa manda e patruyero HMS Trent den e zona na final di luna, sin menciona Venezuela ni na su disputa teritorial cu Guyana riba e region di Esequibo, Reuters a informa.
“HMS Trent lo bishita Guyana, aliado regional y socio di e Mancomunidad di Nacion (organisacion di e paisnan cu, den su mayoria, tin laso historico cu Reino Uni), na final di e luna aki como parti di un serie di mision den e region,” a declara for di e ministerio di Defensa Britanico.
Durante luna di december, e presidente di Venezuela, Nicolas Maduro y su colega di Guyana Irfaan Ali, a reuni na Saint Vincent & The Grenadines y a adopta un declaracion conhunto caminda nan ta expresa nan boluntad pa sigui cu dialogo y no haci uzo di forsa pa soluciona e disputa teritorial riba Esequibo.
E anuncio di Reino Uni a tuma luga casi un luna despues di e referendum consultativo Venezolano riba e region di Esequibvo, caminda cu e ciudadanonan a respalda cu un mayoria abrumador n’e Gobierno di Nicolas Maduro, den e eleccion.