CARACAS, Venezuela- E minister di Relacionnan Exterior di Venezuela, Jorge Arreaza, dialuna ultimo a haci entrega di un nota di protesta na e Delegado Financiero di e Confederacion Suiso na Venezuela, Didier Chassot. Esaki ta relaciona cu e sancionnan ultimo impone door di Bern riba Caracas.
“E gobierno Bolivariano ta rechasa categoricamente tal accion, y considerando esaki como metemento y ta mustra subordinacion na e paisnan miembro di Union Europeo, y na e gobierno di Merca”, segun e nota di e minister Venezolano.
E comunicado ta enfatisa cu e medidanan aki ta viola e reglanan fundamental di e Carta di Nacionnan Uni, y e no ta genera condicionnan di dialogo entre ambos nacion. AL contrario, e fortalece e posicionnan extremista cu ta busca un salida violento como solucion.
Dia 28 di maart ultimo, Suisa a impone sancionnan contra di Venezuela y varios di su funcionarionan pa supuesto “violacion di derechonan humano, y debilita estado di derecho y di e institucionnan democratico”.
Cu e anuncio aki, Suisa ta uni na Union Europeo cu a aproba accionnan similar contra funcionarionan Venezolano na januari ultimo. Merca na november di aña pasa y e luna aki a sanciona varios funcionario y ex funcionarionan, y a freeze tur nan activonan.
Fuente:https://actualidad.rt.com