Den fin di siman Federacion di Ajedrez Aruba a organisa e unico torneo internacional di ajedrez na Aruba, The Aruba Chess Challenge (ACC), cual a tuma luga na MFA Paradera. Tradicionalmente e ACC ta ser organisa den e siman di Herfst Vakantie y esaki ya tabata di 11 edicion di e torneo aki. Unda durante e prome 9 edicionnan di e ACC den e categorianan di Abierto y U-18 tabata hunga 5 rond den 3 dia, pero desde aña pasa ta hunga 7 rond den 4 dia.
Den e seccion Abierto un total di 20 hungador di 4 pais a participa. Tabatin hungadornan di Alemania (1), Aruba (9), Corsou (2) y Venezuela (8).
Desde un comienso Venezuela su hungadonan tabata domina e bueltanan. Nan bin cu hungadonan fuerte cu ratingnan riba 2000, incluyendo Maestro FIDE y Maestro Candidato.
E prome buelta a ser hunga diahuebs anochi dia 6 di October. Despues di e buelta aki, tabatin 8 hungado na prome lugar, ya cu cada uno a gana nan wega y tabatin 1 punto.
Diabierna dia 7 di October, a hunga buelta nr. 2 y 3. Despues di 3 buelta, FM Alexander Hernandez Jimenez (Ven), FM Jose Mora Moron (Ven), Jesus Alberto Molina Sumoza (Ven) y Jose Andrade Pautt (Ven) tabata lidera e torneo cu 2,5 punto di 3 wega.
Diasabra dia 8 di October a hunga bueltanan 4 y 5. Na final dje dia aki, tres hungado di Venezuela tabata lidera e torneo cu 4 punto, cualnan tabata Jesus Alberto Molina Sumoza, FM Jose Mora Moron y Jose Andrade Pautt, mientras cu CM Jose Pesquiera di Aruba tabata na di 4 lugar cu 3,5 punto y tras di dje tabatin 5 hungado cu 3 punto.
E bueltanan final a ser hunga riba diadomingo dia 9 di October. Riba e dia decisivo aki, e hungado di Venezuela, Jesus Alberto Molina Sumoza, a mantene su liderasgo y a termina cu 6 punto, mescos cu su paisano FM Jose Mora Moron, pero pa sistema di desempate, Jesus ta gana e torneo. Na di tres luga a termina FM Alexander Hernandez Jimenez (5 punto), na di cuater luga Jose Andrade Pautt (4,5 punto), na di cinco luga Giuseppe Boyer Censore (4 punto), na di seis lugar a termina e hungado di Aruba CM Jose Pesquiera (4 punto), mientras cu na di 7 luga a termina Ely Saul Sequera Gimenez (4 punto), na di 8 lugar e hungado di Corsou CM Sherman Maduro (3,5 punto), na di 9 luga a termina Luis Anibal Rodriguez (3,5 punto) y na di dies luga a termina CM Jose Alejandro Colina Nune (3,5 punto).
Tur 8 hungado di Venezuela a termina den e top-10, unda cu Aruba y Corsou a logra di 6 y di 8 puesto. E prome 5 luganan a gana premio di placa (prome lugar a gana $750, di dos lugar $500, di tres lugar $300, di cuater lugar $200 y di 5 lugar a gana $100), mientras cu e prome 10 luganan a haya tambe un certificado di The Aruba Chess Challenge.
E Director di Torneo, CM Octavio Croes, e Arbitro Principal IA NM Ulises Hernandez (Ven) y Arbitro Asistente FI CM Raymundo Dijkhoff, a keda hopi satisfecho con e torneo a cana, mirando cu tabata prome biaha cu e ACC a ser hunga den un edificio di MFA y esaki a resulta di ta hopi bon. No tabatin mucho contra tempo tampoco, mientras cu e nivel di weganan tabata di bon calidad y te ultimo tabatin hopi tension pa wak kendenan lo termina riba e posicionnan mas halto. FAA ta felicita tur e ganadornan di e torneo internacional hopi exitoso aki.