Fuerza Armada Nacional Bolivariana (FANB) “a localisa y destrui cuater campamento asocia cu narcotrafico” den e municipio Jose Maria Semprun di estado Zulia, cendiendo miles di kilogram di substancia uza p’e produccion di cocaina na candela, hefe di e Comando Strategico Operacional di FANB, Domingo Antonio Hernandez Larez, a comunica diabierna ultimo.
Di acuerdo cu e comunicado, den cuadro di un operacion conhunto di FANB, e Superintendencia Nacional Antidrogas (Sunad) y e Comando Nacional Antidroga di Guardia Nacional Bolivariana, dos campamento cu tabata funciona como laboratorio p’e procesamento di clorhidrato di cocaina y dos deposito di material logistico a wordo destrui.
Como resultado di e operacion, a kima un total di 9250 kilogram di clorhidrato di cocaina, 1.500 liter di acetona, mil liter di gasolin, como tambe 470 liter di acido clorhidrico y 360 liter di acido sulfurico, entre otro substancia.
“Venezuela ta combati tur dia contra e plaga di e gruponan transnacional di narcotrafico cu ta crusa frontera pa sconde den e mondinan y e areanan limite bao di e regimen di proteccion ambiental manera parke natural y reserva forestal. Venezuela ta teritorio di paz!”, Hernandez Larez a conclui, señalando cu su pais “no lo sirbi di plataforma” di e gruponan yama “Teroristas Armados Narcotraficantes Colombianos” (Tancol).