CARACAS, Venezuela – Prome Vice presidente di Partido Socialista Unido de Venezuela (PSUV), Diosdado Cabello, a anuncia cu algun famia di e personanan cu a muri durante e protestanan, cu a wordo convoca na 2014 pa Leopoldo Lopez, lo solicita na corte pa e wordo acusa di asesinato.
“E famia di e victimanan a introduci of ta pa introduci un demanda na corte pa nan acus’e di asesinato pa e 43 mortonan cu e asesino aki a cuasa riba e dia di e fecha di “la salida”, Cabello a bisa durante su programa transmiti via e canal estatal VTV.
Dia 12 di Februari, 2014 a tuma luga un marcha antigubernamental cu a wordo convoca pa e dirigente opositor Leopoldo Lopez y cu a culmina cu hechonan di violencia.
Dicho actonana cuminsa cu un ola di protesta cu a extende te na Juni y a registra oficialmente 43 morto.
Lopez ta cera desde Februari 2014 y ta cumpli un condena di casi 14 aña di prizon acusa di instigacion publica, asociacion pa delincuencia, dañonan na propiedad y incencio pa actonan violento.
Riba e ultimo, Cabello a bisa cu a acusa Lopez di e delitonan aki pasobra hues Franklin Nieves (kende a dicta e condena na Lopez) a sigura cu solamente eseynan ta loke a wordo imputa.
Tambe e Parlamentario Chavista a insisti cu “Leopoldo Lopez mester sigui cera, e tin cu paga pa e 43 mortonan.”
E oposicion Venezolano y e defensa di Lopez a sostene cu e encarcelamento di e dirigente ta inhusto y cu pesey e ta un “preso politico” di e Gobierno di Nicolas Maduro.
Fuente: RCN Noticias