Na comienso di aña cu Venezuela a cera su frontera cu islanan ABC, Hulanda a bay papia cu Venezuela pa asina habri e frontera bek. Venezuela a priminti di tin mas control ariba ilegalidad. Pero a ripara cu mas y mas ta e Venezolanonan cu ta bay den un aventura di sali den boto chikito pa bin Aruba, en busca di un miho biba y huy di e crisis. Sra. mr. Evelyn Wever- Croes, Prome Minister di Aruba, a elabora ariba e situacion aki.
Ultimo atrobe dos persona a perde nan bida, den nan afan di yega Aruba. Hopi ta esunnan cu ta core e risico via lama pa drenta Aruba, invita door di nan mesun hendenna. Bin via lama, no ta sin su riesgo. Prome Minister a sigui bisa cu ora cu autoridadnan Venezolano kier a bin busca e curpanan, nan a pidi cooperacion cual a wordo duna. A bisa nan cu e responsabilidad primario di loke ta sosode na Venezuela, ta responsabilidad di Venezuela.
Al parecer diputadonan di estado Falcon lo entrega un keho contra di Hulanda, exigiendo un miho trato na refugiadonan Venezolano cu yega Aruba of Corsou. Pero e responsabilidad primario ta di Venezuela, cu si nan trata su ciudadanonan mas humanamente, cu nan no ta bin Aruba poniendo nan bida na peliger. Esaki ta importante pa tene cuenta cun’e. A pidi embahador di Reino na Venezuela, cu ta verwacht pa nan asumi nan responsabilidad.
Apart di esey, Aruba y Edo Falcon a cera un acuerdo, ora cu a firma pa habri e frontera, cu nan lo controla nan fronteranan mas miho, cu niun balsero lo no sali mas, ni cu barco di fruta. Pa concretisa esakinan, mester bay entre Hulanda y Venezuela, ya cu relacionnan Exterior ta den man di Hulanda. A pidi departamento di Relacionnan Exterior, pa Hulanda atende esaki cu Venezuela.
Estado Falcon prome cu e keha Aruba, e mester tene zorg pa primeramente zorg pa nan ciudadanonan. Nos tur ta sernan humano, y ta dispuesto pa yuda. Pero no por carga e peso di Venezuela ariba nos lomba, segun Sra. mr. Evelyne Wever- Croes.
No por culpa Aruba, ya cu ta Hulanda ta esun cu a duna ordo pa habri e frontera. Y esaki ta loke ta den proceso cu Hulanda, unda Prome Minister lo tuma contacto cu miniser di Relacionnan Exterior, Sr. Stef Blok, cu ta esun encarga cu esaki. Y den e caso aki, mirando cu e asunto aki ta algo di Reino, nan no por keda sin carga nan responsabilidad den esaki.
Aruba por yuda unda cu por, pero Aruba no por carga tur e responsabilidad tampoco, segun Prome Minister, Sra. mr. Evelyne Wever- Croes.