Venezuela lo exclui dollar for di e sistema cambiario oficial

CARACAS, Venezuela – El vice- presidente encarga cu asuntonan di Economia pa Venezuela, Tareck El Aissami, a anuncia diamars cu tur e transaccionnan di e mercado cambiario Venezolano lo wordo haci na euro y no den dollar, manera e tabata wordo haci te cu awo.

E funcionario a splica cu e sancionnan mas reciente impone door di e gobierno Mericano contra di e pais Suramericano “ta blokia” e posibilidad di sigui haci transaccionnan riba e mercado cambiario Venezolano cu e dollar. “E ta un prohibicion legal, arbitrario, contrario di e derecho internacional”, el a adverti.

Entre e medidanan economico anuncia diamars, por haya e solicitud di cuminsa un schema nobo pa e coresponsal bancario di e sistema publico. El a sigura cu a realisa adelantonan riba e tema di operacionnan comercial cu paisnan di Asia y Europa.
Pagonan blokia
E vice- presidente di e area economico a informa cu den e 57 dianan di e programa di recuperqacion economico adelanta door di gobierno Venezolano pa alivia e crisis economico a haci transaccionnan pa 60 miyon dollar a trabes di e sistema di subasta Dicom na personanan natural y huridico.
Sin embargo, e sector agroindustrial y farmaceutico a manifesta cu ora cu pagonan wordo emiti den divisa desde e pais Suramericano, e transaccionnan di biaha ta wordo blokia. Pa e motibo aki, desde awo e transaccionnan lo wordo haci den euro y otro moneda internacional.
El Aissami a expresa cu “e blokeo financiero imponi door di Merca” ta afecta e sector publico y priva di Venezuela. “Esaki ta pa boso wak te unda e locura di e imperialismo ta yega”.
Den un conferencia di prensa cu el a duna hunto cu e presidente di Banco Central di Venezuela, Calixto Ortega, y e minister di Economia y Finanzas, Simon Zerpa, e vice – presidente economico a manifesta cu “nan ta sigui pretende di impone tasanan di cambio cu no ta coresponde na e formulanan economico racional”.
El Aissami a informa tambe cu henter e sistema bancario nacional lo wordo incorpora na e sistema di mercado cambiario Dicom. Anteriormente solamente banconan estatal y un grupo priva tabata por a realisa transaccionnan.
Na mes momento el a anuncia cu lo emiti un resolucion pa hisa e reserva legal di 31% pa 40%, “pa evita cu e bolivar soberano subi e mercado speculativo”. E reserva legal ta e porcentahe di recursonan cu e intermediarionan financiero mester mantene congela.
E vice – presidente economico a anuncia cu 2 biyon euro lo bay e mercado e cambiario nacional y cu estado lo haci ofertanan di divisa entre november y december pa e sectornan productivo.

Comments

comments