CARACAS, Venezuela – Avion, tanki y miles di solda y civilnan arma a desplega diasabra na Venezual den ehercisionan militar cu e presidente Nicolas Maduro a ordena, ante e “menasa” di e Gobierno di Donald Trump, un dia despues di e anuncio di sancionnan financiero contra e pais petrolero.
Mas ofm enos 200 mil efectivo di e Forsa Arma Nacional Bolivariano (FANB), hunto cu 700 mil militante, reservista y civil, lo a realisa e “Ehercicio Soberania Bolivariana 2017”, cu practicanan di tiro y maniobra cu ekiponan di combate den varios region.
Diabierna, un decreto di Trump a prohibi pa negosha debe emiti pa e Gobierno Venezolano y pa su petrolera estatal PDVSA, loke cu Maduro a cualifica como un “brutal agresion” cu lo abona na e tereno pa un posibel intervencion Mericano.
Trump a adverti dia 11 di Augustus ultimo cu, entre e alternativanan, ante e grave crisis politico y economico Venezolano, e lo analisa “un opcion militar” aunke figuranan halto di su Gobierno, a desalenta e posibilidad ey.
E Forsa Arma, den un conflicto escala entre Caracas y Washington, ta sera filanan entorno maduro, kende a duna alto mando gran poder economico y politico.
“Nunca antes FANB tabata mas cohesiona,” e hefe di e Comando Estrategico Operacional, Remigio Ceballos a bisa diabierna, kende a asevera cu e ehercicionan lo activa un “fase di alerta.”
E Embahada di Washington na Caracas, a adverti Mericanonan biba na Venezuela, pa tene alerta ante e maniobranan, alertando riba e riesgo cu ta implica e participacion di civilnan arma.
Propaganda
E mandatari ta plantea e ehercisionan como un desafio pa Merca, pero e specialista den materia militar, Rocio San Miguel, a cualifica “simpel propaganda” cu “Maduro tin mester” a lo interno y externo.
“E prome ta pa eleva e costonan di cualkier deslealtad den FANB, asunto cu ta preocupa e sistema di inteligencia. E di dos ta pa reafirma e discurso antiimperialista cu ta haya den e solidaridad den e narativa Latino Americano,” San Miguel a bisa AFP.
Na principio di Augustus, un comando di mas of menos 20 homber – entre nan tres oficial – a ataca un base strategico militar na Valencia y a horta arma.
Internacionalmente, San Miguel ta apunta, Maduro “mester haci hende kere cu Rusia, su principal bendedo di arma, ta constitui un aliado den materia di defensa nacional, hisando e costo Mericano di cualkier intervencion militar.”
Maduro ta enfrenta presionnan fuerte di e comunidad internacional, cu a aumenta tras di e instalacion di un Asamblea Constituyente cu el a impone y cu ta maneha e pais como un suprapoder.
Merca y varios Gobierno Latino Americano, ta cualifica e Constituyente como un paso pa un “dictadura.”
Sancionnan economico
Mey mey di e tensionnan, Merca a impone e prome medidanan economico contra e pais, tras sancionnan individual contra Maduro y otro alto funcionarionan, acusa di kibra “e orden democratico” y “viola derechonan humano” den e protestanan opositor cu a laga mas of menos 125 morto entre April y Juli.
Maduro, kende a considera e medidanan ey ilegal, a convoca empresanan di Merca pa cumpra petroleo Venezolano den un reunion “urgente” na Caracas, como tambe na e tenedonan di bono di deuda Venezolano, di cual 62% a bisa, ta di e pais aki.
Segun e presidente di Venezuela, e tin “mercado sigur” pa bende e 800 mil bari diario di petroleo cu ta poni riba e mercado Mericano. Su produccion total ta ubica den 1.9 miyon.
“Mi ta saca mi man na inversionistanan Mericano, na esnan cu ta na Venezuela y na esnan cu kier bin,” el a agrega.
Segun e mandatario, dirigentenan di oposicion Venezolano a influi den e Gobierno di Merca pa nan impone sancionnan financiero, di cual el a pidi na corte suprema y na e Constituyente pa habri un “huicio historico pa traicion na e patria.”
Particularmente e ta acusa e presidente di Parlamento di mayoria opositor, Julio Borges, kende den e ultimo lunanan a biaha pa Merca y otro paisnan di e hemisferio buscando respaldo.
Fuente: www.afp.com