“Nos tin un batalla fuerte contra e sancionan internacionalizan”, asina presidente di Venezuela, Nicolas Maduro a declara referiendo na e atakenan di Merca y su aliadonan. E presidente di Venezuela a señala cu e sancionnan internacional cu Merca ta aplica y su aliadonan contra e pais, a causa perdidanan multimiyonario durante 2018. Esaki pa afixia e economia Venezolano y tambe caba cu e rikesanan natural cu e nacion ta posee, asina e mandatario a declara. “Nos tin un bataya fuerte contra e sancionnan internacional cu a pone Venezuela perde mas of menos 20 mil miyon Dollar den 2018”, e lider Bolivariano a duna di conoce. Mas cu un blokeo, loke ta wordo haci contra e pais ta un persecusion, asina Nicolas Maduro a sigui bisa. “Nan ta persigui e cuentanan bancario, e compranan rond mundo di cualkier producto, pues e ta mas cu un blokeo, e ta un persecucion di cuentanan bancario di e negoshinan cu Venezuela ta haci rond mundo”, presidente Maduro a declara.
E situacion cu e empresa Venezolano Euroclear ta un ehempel di esaki, presidente Maduro a sigui bisa. For di e compania aki Merca a “secuestra” 1400 miyon Dollar cu tabata disponibel pa cumpra medicamentonan, pa cumpra cuminda y ningun hende ta haci su mes responsabel. Mientrastanto, e mandatario a mustra cu Venezuela a denuncia na varios oportunidad e persecucion aki di ONU y dilanti e secretario di e instancia aki, mescos tambe serca varios organismo, pero sin haya respuestanan concreto. E hefe di estado di Venezuela tambe a mustra cu for di Augustus 2018 tin e Programa di Recuperacion, Crecemento y Prosperidad Economico, cual proposito ta stabilisa e economia di e pais, controla e inflacion y hisa produccion di Venezuela.