CARACAS, Venezuela- Gobierno di Venezuela, cu ta pasando den un crisis economico, politico y social, diahuebs a manda 12 ton di material y ekipo. Esaki tabata den forma di un ayudo humanitario pa Cuba, despues di a wordo afecta pa e pasada di e tormenta subtropical “Alberto”. Reverol a indica cu e accion ta coresponde na un acto di “solidaridad y apoyo na nos pais ruman”.
E accion aki ta tuma luga despues di e bishita di e presidente Cubano, Miguel Diaz- Canel, na Venezuela. Diaz- Canel a ricibi e Orden di Libertador, condecoracion destina pa distingui Venezolanonan, stranhero, institucionan publico of priva cu pa nan merito y servicio “a destaca den e lucha na fabor di causanan libertador di un mundo multipolar, multietnico, pluricultural y socialista”.
Sin cu el a recupera full di e desastre cu horcan Irma a laga atras, Cuba ta hay’e confronta cu otro desaster causa pa e tormenta subtropical Alberto. Yobidanan causa door di Alberto a laga 4 persona morto y dañonan cuantioso, den e infrastructura, vivienda y cultivonan.
Sistema tropical number 3
Minister Reverol a detaya cu’n tormenta tropical number 3, situa na 990 miya nautica di e peninsula di Paria, te yegando e pais den e siguiente 36 oranan.
“Nos ta bezig ta monitor e activacion di e sistema di yobida di Venezuela y e zona di convergencia intertropical. E aña aki tin previsto entre 10 y 16 tormenta tropical den Atlantico y Lama Caribe”, Reverol a splica.