Venezuela a haci pagonan pa salba su refinerianan na Merca

CARACAS, Venezuela- E pais Suramericano, Venezuela lo mantene su refinerianan Citgo na Merca, despues cu el a logra resolve un disputa largo cu a pone e propiedad mas aprecia di e pais Suramericano mientras cu su debe ta sigui aumenta.
Diabierna, Venezuela a cuminsa paga 1.4 biyon dollar cu’n corte a dicta cu e firma minero Canades Crystallex, despues di e expropiacion di e compania door di e fayecido presidente Hugo Chavez ya caba casi un decada. E pago inicial di 425 miyon dollar lo permiti Venezuela di mantene e propiedad di e refinerianan.
Russ Dallen, un corredo di Caracas Capital Markets, cu sede na Miami, a bisa cu e pago ta mustra un cambio den strategia di Venezuela: stop di lucha contra di e acreedornan pa yega na acuerdonan.
Sin embargo, ainda no ta duidelijk si Venezuela lo por sigui paga e debe cu e tin cu Crystallex y un lista largo di otro acreedornan cu awo ta para den rij pa cobra.
“No tin suficiente petroleo y placa pa paga tur esunnan cu e mester paga awo”, Dallen a bisa. “Nan ta manera hamster riba un weel”.
Inflacion na Venezuela lo por supera e 1 biyon % pa fin di aña. Den ultimo añanan, e produccion petrolero tambe a cay na nivel mas abou den shete decada.
Entre hopi cu tabata spera riba placa, Venezuela tin un acuerdo di pago cu Rusoro Mining di 1.3 miyon dollar y otro acuerdo cu e gigante petrolero ConocoPhillips pa un balor di 2 biyon dollar. Aña pasa, Venezuela a keda sin paga 65 biyon dollar na bondholder y otro acreedornan cu ainda ta sperando pa yega na acuerdo.
Na principio di 2009, Chavez a anuncia e expropiacion di e operacionnan minero di Crystallex den estado Bolivar, un region rico den mineral cu ta conta cu’n deposito di oro mas grandi di Suramerica. El a acusa e companianan minero di daña e medio ambiente y viola derecho di trahadonan, y el a expropia e compania Canades como parti di un revolucion socialista cu a laga e pais den man di e presidente actual Nicolas Maduro.
Pa recupera su perdidanan, Crystallex tin wowo ariba Citgo, cu base na Houston, obligando Venezuela na bende un di su activonan den exterior mas stima, balora na 8 biyon dollar. Citgo ta parti di e compania petrolero oficial PDVSA y tin tres refineria na Louisiana, Texas y Illinois, ademas di un red di oleoductonan.
E documentonan presenta diabierna den un corte Canades stipula pa Venezuela paga 425 miyon dollar na Crystallex y yega na un acuerdo pa duna e resto na 2021.
“Bo por evita y sconde, pero si corte bisa cu bo debe placa, bo debe placa”, Dallen a bisa. “Como cualkier acreedor cu bo no paga, nan lo bay buscabo”.

Comments

comments