CARACAS, Venezuela – Miles di Venezolano a forma diamars den rijnan largo pafo di e banconan pa deshaci di nan biyete di 100 boliar, e mayor denominacion, despues cu presidente Nicolas Maduro a decreta su salida di circulacion.
Diadomingo, Maduro a haci e sorpresivo anuncio como un medida pa combati contrabando di papel moneda Venezolano na e frontera cu Colombia cu, segun el a bisa, ta parti di un “guera economico” contra su Gobierno.
“Ta ridiculo,” Isabel Hernandez, un ama di cas cu tabata spera den un extensa fila di un banco na Caracas, a keha. “Mi tin para desde 7’or di mainta aki y mi no por a deposita nada.”
Manera Hernandez, hopi Venezolano a acumula biyetenan di 100 bolivar pa por realisa nan pago, mey mey di un crisis di efectivo suta pa e inflacion di mas halto na mundo y constante faya den e terminalnan di puntonan di benta POS.
Te cu diahuebs, nan por cambia nan placa den un banco publico y priva. Desde diabierna, lo cuminsa cu un plazo di 10 dia pa sigui cu e proceso pero solamente den e oficinanan di Banco Central di Venezuela (BCV), di acuerdo na e norma publica den e Gaceta Oficial cu a circula diamars.
Segun cifranan oficial, mayoria di e biyetenan den circulacion ta di 100 Bolivar, pa loke e analista y opositornan ta considera cu e medida lo complica ainda mas e maneho di e efectivo.
“Esaki ta un caos, mi ta angustia, nos no sa unda nos ta bay cu e Gobierno aki,” Gilda Morillo a bisa, kende ta un economista desemplea pafo di un banco di e ciudad occidental di Maracaibo, unda testigonan di Reuters a presencia pelea entre cliente pa haya un luga den rij, apesar di e medidanan fuerte di siguridad, desplega pa Gobierno. Hopi a acudi na e agencianan bancario hibando saco, maleta y hasta caha repleto di e biyetenan di 100 bolivar, cada uno ekivalente na 0.15 dollar na e cambio oficial y 0.025 dollar riba e tasa paralelo.
Den un intento pa facilita e pagonan exagera cu e efectivo, Gobierno lo introduci seis biyete nobo, te cu 20.000 bolivar den e proximo dianan.
Maduro, cual popularidad a cay a medida cu e crisis economico ta bira mas pisa den e pais, miembro di OPEP, a bisa diamars cu e decision tabata pa “proteha e pueblo”, kende segun el a afirma cu e no tin “pakico preocupa.”
En busca di combati contrabanda di biyete, Maduro a decreta e anochi di dialuna e ciere di e frontera cu Colombia pa tres dia y su ministernan di Defensa, Vladimir Padrino, a agrega cu tras di e medidanan a incauta 104 miyon di bolivar en efectivo y a detene 117 persona.
Fuente: Reuters