Veiligheidshuis Aruba ta un cooperacion den e cadenanan hudicial, cuido, social y enseñanza. Drs. Bernice Schulte, procesmanager di Veiligheidshuis Aruba ta splica cu e cooperacion entre e dieztres partnernan fiho ta nifica cu cada dos siman e partners ta topa pa un ‘casus overleg’. Durante e encuentro aki ta trata casonan multiproblematico cu ta requeri e experticio di e diferente organisacionnan pa por yega na un resultado duradero y positivo.
E partnernan fiho cu Veiligheidshuis ta traha cu ne ta Bureau Leerplicht, Bureau Sostenemi, Directie Sociale Zaken, Directie Voogdijraad, Fundacion Guia Mi, FMAA (Fundacion pa Maneho di Adiccion), Respaldo (Fundacion Salud Mental), Bureau Slachtofferhulp, Cuerpo Policial di Aruba, Ministerio Publico, Reclassering y KIA. Segun Schulte, Veiligheidshuis Aruba ta traha na un forma hopi proactivo y integral riba e casonan aki. “Durante e ultimo dos aña tin un compromiso hopi grandi di e partners y nan ta traha cu hopi dedicacion” Schulte a enfatisa. E liñanan di comunicacion ta mas cortico y Veiligheidshuis ta zet in e ayudo mas liher. Esaki ta hasi cu hopi caso ta haya un yudansa na un manera mas liher y esaki ta na bienestar di e cliente di e famia. Na e momento aki tin cuater doelgroep of focus na Veiligheidshuis Aruba. E gruponan mas grandi ta e grupo di hobennan cu ta core risico, casonan di violencia domestico, personanan cu a residiveer of relapse ta purba yuda nan pa nan no cai bek y casonan cu ta wordo yama e ‘double troubles’ cual ta personan cu tin problema di adiccion y psychiatrico. Ultimamente e grupo di nos grandinan tambe tin e atencion di Veiligheidshuis, mirando cu tin varios caso preocupante di negligencia, alimentacion y cuido general.
Abuso sexual di mucha
Schulte ta splica cu e forsa di Veiligheidshuis ta cu ora trece un caso aden, e ta wordo registra den un sistema digital. Den e sistema aki ta palabra e intervencionnan cu cada partner, pa ki tempo esaki mester ta cla y con ta sigui cu e caso. Asina ta keda monitoria cada caso pa no perde e caso for di bista. “Casonan di abuso sexual di mucha ta casonan hopi delicado y hopi biaha no ta e abuso riba su mes pero hopi biaha tin otro mas problematica cu ta hunga den e famia. Tur esey mester e atencion” Schulte ta splica. Veiligheidshuis ta traha na un manera sistematico y integra pa trata tur e problematica den un famia.