CIUDAD DI VATICANO, Vaticano – Iglesia Catolica ta prohibi su fielnan pa esparci e shinishi di e difuntonan, partinan entre famia y tambe pa wordo conserva na cas, segun un documento publica diamars.
E Doctrina di Fe, e ex Santo oficio, a redacta un documento nobo cu e nomber di “Instruccion Ad resurgendum cum Christo” cu ta substitui e anterior di 1963, cu a wordo aproba dia 18 di Maart pa papa Francisco, y cu ta pone orden dilanti practicanan nobo tanto di sepultura como di cremacion considera “den desacuerdo cu fe di Iglesia.”
Den e documento ta wordo splica cu aunke iglesia ta sigui prefera e deramento di curpa, ta acepta e cremacion pero ta prohibi di plama e shinishi, dividi’e entre famia of conserva esaki den cas.
“Pa evita cualkier mal entendido panteista, naturalista of nihilista, no lo wordo permiti e dispersion di e shinishi den aire, tera, lama of den cualkier otro forma, of e conversion di shinishi den recuerdonan conmemorativo, den piesanan di joyeria of den otro articulo,” por a wordo lesa den e documento aki.
Ademas, ta adverti cu “den e caso cu e difunto lo tabata dispuesto na cremacion y e dispersion di su shinishinan den naturalesa pa rasonnan contrairo na e fe Cristian, mester nenga esaki.”
Aunke despues a specifica durante e presentacion di e documento cu e negacion di e entiero lo ta solamente si e difunto a manifesta den su ultimo boluntad, e deseo di esparci e shinishi cu expreso rechaso di e practicanan di e fe cristian.
Iglesia Catolica ta señala cu no por permiti “actitud y ritualnan cu ta implica conceptonan eroneo di morto, considera como anulacion definitivo di e persona of como momento di fusion cu mama naturalesa of cu e universo, of como un etapa den e proceso di reencarnacion of como liberacion definitivo di e “prizon” di e curpa.”
E ex Santo Oficio ta agrega ademas cu e conservacion di shinishi den cas ta permiti “solamente den casonan di circunstancianan grave y excepcional,” y ora un persona pidi’e “pa piedad of cercania,” e consultor di e Congregacion di e Doctrina di Fe, e Spaño Angel Rodriguez Luño, a splica den un rueda di prensa di e presentacion di e documento.
Pa Iglesia, “e conservacion di shinishi den un luga sagrado por yuda reduci e riesgo di substrae e difuntonan di oracion y e recuerdo di e famianan y di e comunidad cristian.”
Y di e manera ey, nan ta agrega, “ta evita e posibilidad di olvido, falta di respet y mal trato cu por bin una bes cu pasa e prome generacion, mescos cu practicanan inconveniente of supersticioso.”
Fuente: NTN24