Minister di Turismo, Salubridad y Deporte Sr. Dangui Oduber a bisa cu deporte lo haya e atencion necesario y lo pone deporte bek como prioridad. Pa 8 aña largo e gobierno di AVP a neglisha deportistanan, deporte y complehonan deportivo por completo. Ta un cantidad di compleho Deportivo cu ta resorta bao maneho di Fundacion Facilidadnan Deportivo ta den cai den otro y ta den mal estado. E ta un berguensa cu durante 8 aña no por a presenta un plan general di mantencion pa asina por mantene tur e complehonan deportivo na un nivel aceptabel.
Minister Oduber su maneho di deporte ta dirigi riba stimula movecion den barionan, inverti den facilidadnan deportivo, pone iluminacion na veldnan y sin lubida e Proyecto di yerbe artificial. Lo duna e deportista atencion y muy specialmente esunnan di alto rendimiento. Lo stimula y pone fondo disponibel pa prepara atletanan pa olimpiada.
Despues di 8 aña porfin ta duna atencion na hopi cos cu a bay robes den deporte. Como parti di maneho di minister Oduber ta percura ta tur facilidad ta gosa di bon iluminacion. Asina aki minister Oduber a percura pa cambia tur e bombionan nan y pone nobo na veld di Duracell y tambe pronto Kudawecha tambe lo ta na turno.
Minister ta convenci cu na momento cu duna atencion na e facilidadnan esaki lo stimula nos hobennan pa practica mas deporte. Porfin minister Oduber ta mira luz na horizonte den e caso di Lotto pa deporte y pronto lo tin control bek pa por haci hopi mas cu e fondonan aki.
Unabes esaki ta e caso por spera cambionan drastico den deporte caminda minister Oduber porfin por cuminsa ehecuta su maneho y vision pa cu deporte.