MADIERA, Portugal – Al menos 29 persona a muri den un accidente di trafico riba e isla Portugues di Madeira, diaranson den oranan di atardi. Esaki segun informacionnan di e agencia Reuters, citando medionan local y e agencia Lusa. Segun e alcalde di e municipio di Caniço, Filipe Sousa, a declara na canalnan di television SIC, mayoria di e turistanan tabata Aleman.
E Diario de Noticias ta relata cu e accidente a tuma luga den un bocht hopi skerpi den e conseho di Santa Cruz. Al parecer, e bus no a baha e velocidad ora el a tuma bocht y a bolter. Debi na e orografia di e isla, cu subida y bahadanan peligroso, e bus a bay cay ariba un cas, unda tabata tin varios persona na e momentonan ey. E prome noticia tabata papia di dos morto, mas despues esaki a subi na nuebe y awo ta papia di al menos 29.
“Varios persona a wordo traslada pa e hospital di Cruz de Carvalho y otronan a wordo atendi na e luga di e accidente”, segun Sousa a declara na e agencia Lusa. Ainda no tur nacionalidad di esunnan cu a haya accidente ta conoci.
Servicio regional di Proteccion Civil a informa cu 50 persona y 19 vehiculo a traha den e labornan di rescate y den e accionnan di rescate di e cas daña, entre nan bombero y personal di ambulance. Segun e prome hipotesis, e causa di e accidente lo ta relaciona cu algun problema cu e brake di e bus, den cual tabata tin 53 persona biahando. E bus a caba di sali for di e hotel Quinta Splendida, y na poco meter despues, den un di e prome bochtnan, e accidente a tuma luga.
Madeira den e epoca aki ta un destino turistico importante, caminda cu solo y e temperatura semitropical ta garantisa.