Ekiponan di rescate na Italia a bisa cu tin por lo menos 30 persona disparce despues cu un hotel den centro di e pais a wordo dera pa un avalancha, provoca, pa un serie di sismonan. Pero esaki te ainda no ta confirma.
Autoridadnan a informa cu nan a logra haya dos persona cu bida y a recupera un cadaver.
E resto di e huespednan di e edificio, entre nan varios mucha, ta sigui ta dera bou di e sneeuw.
Medionan di comunicacion Italiano a raporta cu entre e fayecidonan tin varios muchanan menor di edad, pero esaki no por a wordo confirma.
Ekiponan di rescate a traha henter anochi purbando na yega na e hotel, ubica cerca di e sero Gran Sasso, den e region di Abruzzo.
Parti di e dak di e hotel a bin abao y habitantenan di e comunidad di Farindola a alerta servicio di emergencia.
Pero e cantidad di sneeuw y careteranan blokia a haci acceso na luga hopi mas dificil.
Medionan di comunicacion Italiano, ta informa cu e prome ekiponan di rescate a yega na e luga pa 4 ‘ or di marduga (hora local).
Por lo menos 20 turista y shete miembro di e personal di e hotel tabata den e hotel na momento di e avalancha.
Varios ta e mensahenan cu algun di e victimanan a logra manda via nan celular despues di a keda dera bou di e sneeuw.
E region montañoso di centro di Italia diaranson a wordo golpia pa cuater sismo tras di otro, y tabata tin varios after shock den oranan di anochi.
Esaki ta e mesun region cu a wordo asota pa un temblor na Augustus ultimo, caminda 298 persona a perde nan bida.