PETRA, Jordania Mas di 3500 turista a wordo evacua for di un di e shete maraviyanan di mundo, e ciudad di Petra (Jordania), pa motibo di awaseronan fuerte y inundacion, cu a profoca e fayecimento di por lo menos 12 persona, segun Al Jazeer a informa.
E awasero torencial y inundacion den e region a cuminsa diabierna atardi.
Videonan publica riba rednan social a mustra corientenan di awa cu tabata core atrabes di e camindanan di e ciudad monumental.
“E bishitantenan mester a wordo hiba na zonanan sigur, prome cu e inundacionnan repentino lo a acumula den partinan di e ciudad montañoso, famoso pa su ruinanan di piedra taya,” e vocero di Gobierno, Jumana Ghunaimat a señala, cita pa e cadena.
Suleiman Farajat, e administrador principal di e ciudad, a anuncia e ciere di e destino turistico, agregando cu nunca el a mira inundacionnan asina intenso den e zona.
Te asina leu, no a reporta cu lo tabata tin dañonan material na e monumentonan di Petra. E ruinanan di e ciudad antiguo, situa entre lama Morto y lama Cora, ta forma parti di e Patrimonio Mundial di UNESCO y ta un di e sitionan arkeologico y destino turistico mas famoso di Jordania y di henter mundo.