Autoridad Mericano a afirma cu e tormentanan invernal fuerte den varios estado di Merca a provoca morto di varios persona, como tambe numeroso daño na infrastructura.
E sneeuw fuerte a provoca un centenar di cancelacion y retraso di vuelo, como tambe ceramento di scol y oficina den varios region. Por lo menos nuebe estado a reporta morto debi n’e friu extremo y caymento di sneeuw fuerte.
Tres persona a muri diaranson den e ciudad di Portland, Oregon, despues cu un kabel di coriente a cay riba un auto durante un tormenta di ijs, segun e medio. E testigonan a bisa cu e causa di su morto tabata electrocucion cu nan a ricibi mientras nan tabata bahando di e auto.
N’e mesun momento, e funcionarionan di e estado di Tennessee a comunica cu por lo menos 14 persona a muri despues cu sneeuw y e temperatura vries a cubri e region, ABC News a informa. Entre e fayecidonan tin un chauffeur di truck cu a dal contra un trailer, un homber cu a cay door di un skylight mientras cu e tabata haci dak di su negoshi limpi y un muhe cu a muri di hipotermia.
Polis di Pennsylvania a reporta diaranson cinco morto despues cu un truck cu un trailer a dal e personanan n’e luga caminda cu anteriormente a sosode un accidente di trafico.
Un total di por lo menos 55 persona den dies estado a muri desde siman pasa, segun CNN.
N’e mesun momento, e Servicio Meteorologico Nacional a adverti cu fin di siman lo t friu y ta spera tormenta di sneeuw y ijs cu lo extende te Mid-West te cu noordoost di e pais. Ta premira cu pa otro siman e temperaturanan subi levemente.
