CARACAS, Venezuela- Forsanan di siguridad di Venezuela a aresta por lo menos 14 militar sospecha di “rebelion” y “traicion” na comienso di April, durante e proem siman di protesta contra di e gobierno di president Nicolas Maduro, segun documentonan obteni door di Reuters.
E efectivonan, incluyendo Coronel y Capitan, ta deteni den e prizon militar di Ramo Verde, pafo di Caracas, segun e lista di detenidonan cu ta circula bou di e militarnan.
E documentonan ta indica cu e casonan tabata den “proceso” y no ta duidelijk di nan a wordo acusa formalmente.
E lista ta surgi mei mei di acusacionnan haci door di lidernan di oposicion riba un supuesto purificacion den e Forsanan Arma pa trapa ariba e disidencia genera door di e represion masivo di e manifestantenan contra di e gobierno Socialista.
E documentonan den poder di Reuters a yega te cu 8 di April. Despues di e fecha ey, lidernan di oposicion y activistanan di Derechonan Humano a bisa cu hopi mas soldat a wordo deteni.
Guardia Nacional, un unidad militar cu ta encarga cu orden publico tabata na frente di e contencion di e protestanan mediante e uzo di gasnan lacrimogen, cañonnan di awa y balanan di rubber contra di hobennan cu ta tira piedra, molotov coctail y sushi humano contra di e liñanan di siguridad.
Den e dos lunanan di protesta, por lo menos 65 persona a muri, incluyendo personanan na fabor di gobierno, como tambe di oposicion, mironesnan y miembronan di forsanan di siguridad.
Oposicion ta sigura cu e inkietud den e forsanan militar a bin ta aumentando, impulsa pa e uzo exceso di forsa contra di manifestantenan cu ta exigi eleccionan adelanta, yudansa humanitario pa alivia e escasez di remedi y libertad di “presonan politico”.
Den publico, e alto mando militar ta respalda e acusacion di Maduro, di 54 aña di cu oposicion ta adelantando un insureccion arma, cu ta buscando un golpi di estado pa deroca su gobierno, apoya door di Merca.
Pero den priva algun miembro di e Guardia Nacional a keha di cansancio y a expresa nan desilusion. Algun soldat a mustra nan malcontento publicamente.
Tres teniente a huy pa Colombia y a pidi asilo na e pais bisiña. Gobierno Venezolano a exigi nan extradicion pa nan enfrenta cargonan di conspiracion pa golpi di estado.
Lidernan di oposicion a bin ta pidi abiertamente pa Forsanan Arma desobedece Maduro y pa apoya nan demanda, pero e alto mando a hura lealtad na e gobierno di Maduro.
Fuente: www.lta.reuters.com