DEN HAAG, Hulanda (AP) — Diaranson, polis a detene al menos 84 supuesto miembronan di mafia na Alemania, Italia, Belgica y Hulanda, unda cu a coy 2 miyon euro den beslag, den un serie di operacionnan coordina contra di un organisacion di mafia Italiano poderoso.
E operaciónnan tabata producto di un investigacion “Pollino”, cu a cuminsa na 2016 contra di ’Ndrangheta, un grupo criminal di zuid di Italia sospecha di trafico di cocaina, labamento di placa, soborno y violencia, Eurojust a splica. E agencia comunitario, cu ta combati crimen organisa mas aleu di e fronteranan, a coordina e operación.
Eurojust a bisa cu esaki tabata e operación mas grandi di e tipo aki na Europa. A rastrea casi 4 ton di cocaina den e operación en conhunto cu a dura dos aña. E inval di diaranson a permiti autoridadnan di tuma cocaina y extasis den beslag, diaranson.
“Awe nos a manda un mensahe cla cu e gruponan di crimen organisa den full Europa”, e vicepresidente di Eurojust, Filippo Spiezia, a bisa. “Nan no ta e uniconan capas di opera a trabes di frontera, e poder hudicial y e forsanan di orden Europeo tambe sa haci esaki”.
Eurojust a bisa cu autoridadnan Italiano a aresta 41 sospechoso, principalmente den e regionnan Sureño di Calabria y Catanzaro.
Na Alemania, polis federal a bisa cu invalnan di marduga na propiedadnan vincula cu ’ndrangheta a logra varios aresto, principalmente den e estadonan di Rijn Noord- Westfalia, frontera cu Hulanda y Belgica, y Zuid- Bavaria.
Cinco sospechoso a wordo aresta na Hulanda, unda fiscalnan a cuminsa un investigacion na 2014, ora cu nan a haci un inval den dos restaurant Europeo y varios mas a wordo deteni na e otro banda di e frontera cu Belgica.
Pero e fiscal antimafia y antiterrorismo Italiano Federico Cafiero De Raho a bisa cu e operacionnan a penas ta pasa ariba e superficie di e poderoso ’ndrangheta, cual tentaculo y actividadnan ilegal ta extende rond mundo.
For di Den Haag, De Raho a bisa cu e arestonan kiermen net “nada pa ’ndrangheta. Tin miles di persona pa aresta ainda y biyones di euro pa coy den beslag ainda”.