ImSan actualmente ta pasando den un proceso di expansion y renobacion, pa cual den un entrevista, director di ImSan, dr. Joel Raijnherc, ta splica di con e proceso ta canando.
Den e ultimo simannan, e proceso ta bayendo den un direccion hopi bon. E parti pafo, den e bunker, e unidad caminda lo bin cu e mashinnan pa radioterapie, ta progresando ariba un bon tempo. Tambe ta bezig cu e salanan di operacion, ta bezig cu e departamento di sterilisacion. Pero a yega na un momento awo, segun e director, eseynan tur ta departamentonan unda cu no tin pashent ainda, ta e momento cu lo cuminsa renoba partinan di e edificio, cu ta bay afecta e pueblo, e pashent, clientenan cu ta bin ImSan.
Kico esey ta encera? Dr. Raijnherc a splica cu e entrada prinicpal di ImSan tin cu wordo renoba completamente. Un di e problemanan ta cu e portanan cu tin awo, cada biaha cu e habri, un cantidad di aire cayente ta drenta y e ta pasa den henter e hospital. Esaki ta pone cu e recibo di coriente ta bin extremadamente halto. Lo bay traha un entrada completamente nobo, unda cu lo bin cu’n sluis nobo, unda cu dos porta mester habri prome cu drenta paden. Esaki ta algo cu tabata van plan di haci pa hopi tempo caba, pero a keda pospone esaki.
Tambe lo probecha pa haci e cambionan necesario di e edificio e parti abao, unda cu actualmente tin e departamento di AZV, tin e recepcion, e laboratorio, e rontgen, e cafetaria, e antesala. Henter e luga aki lo bay wordo afecta. Esaki kiermen cu ta traha un entrada nobo temporalmente pa por acomoda tur e pashentnan cu tin cu drenta hospital. A muda e departamento di laboratorio caba, pa e di dos piso, ariba e dialyse.
E entrada lo ta suficiente grandi pa bay na e centro diabetico. E entrada ey no ta problema pa yega dialyse. A amplia esaki pa por yega eynan cu rolstoel y cu brancard. Es decir, e accesibilidad lo keda bon. No mas cu e ta diferente. Esey semper ta causa cualkier cos cu ta nobo, ta bay tin su obstaculonan. Ta bay ta fastioso pa hende custumbra, pesey ta pidi comprension.
Pa yega na e departamento di saca potret, lo bay puntra tur e pashentnan di ImSan pa haci uzo di e entrada di SEH. Ta pasa door di e sala di espera.
Tur e trabaonan aki lo bay dura mas o menos 4 luna. Den e mesun entrada aki, den e mesun gang central ta trahando e sistema di lift nobo, pa nan por haci uzo di e mesun temporada aki pa caba esaki tambe. Es decir e ta bay dura mas o menos 4 luna, pero despues di esey, henter e accesibilidad na e hospital ta completamente cla y renoba.
A traha un entrada special nobo, unda lo marca pa ambulance y life light cu pashentann cu ta bin cu esakinan. LO traha un parkinglot pa incapacita. Ta keda e mesun cantidad. Pa fin di januari, pa 27 di januari pa ta exacto, lo bay cera e entrada principal caba.
Ta buscando solucion pa amplia e parkeerplaats na ImSan. Ta hayando hopi bon cooperacion di e doñonan di tereno, pa wak con pa yega na areglo. Tin varios posibilidadnan, pero ta sigur cu mester haci esaki ya cu den futuro lo por bin mas ampliacion di servicionan cu ta wordo brinda na Imsan. Y lo por haci uzo di e tereno di parkeer, pa asina tin mas accesibilidad na e edificio cu tin caba, y traha edificio nobo unda e parkeerplaats ta y hala e parkeerplaats un tiki mas leu, segun e director di ImSan, dr. Joel Rainjherc.