Sra. Ugina Thompson, coordinador di e evento di e 100 aña di Salud Publico ta splica cu lo tin varios actividad cu lo tuma luga e aña aki.
Directie Volksgezondheid a cuminsa na Februari cu e celebracion di 100 aña. Parti mainta e trahadonan di DVG a bay Parke Arikok y despues e personal a wordo dividi den diferente grupo y nan a siña cushina algo saludabel. Otro grupo a siña con pa preveni un candela na cas y nan trabao. Un otro grupo a siña con pa traha un greenhouse y tambe un grupo a haya un curso di defensa propio.
Na Juni e celebracion ta sigui, segun Sra. Thompson y nan no kier celebra esaki cu e empleadonan actual so. Y por lo tanto, nan kier invita tur ex- empleadonan tambe pa celebra hunto cu nan. DVG no tin un data base di ex- empleadonan di DVG. esaki ta mas cu mil hende. Pesey nan ta pidi pa tur hende cu a traha den Salud Publico, DVG pa tuma contacto cu nan na 522-4200.
Sra. Thompson a sigui splica cu nan lo tin dos actividad den Juni. e prome lo tuma luga dia 16 di Juni, diabierna awo, parti mainta, unda cu e empleadonan lo bay Parokia Birgen di Fatima na Dakota pa un Santo Sacrificio di Misa. Despues nan lo tin un brindis na DVG, e parti dilanti. Tambe nan ta celebra cu e edificio di DVG a bira monumento.
E di dos actividad lo tuma luga dia 23 di Juni proximo pa 7 or di anochi. Un biaha mas, Sra. Thompson ta haci un apelacion pa tur esunnan cu tabata traha na DVG antes, pa tuma contacto cu nan, pa asina esakinan por haya nan invitacion. Esaki ta conta pa tur e dokternan cu tabata traha na DVG y cu awo ta cay bou di AZV, Landslaboratorium, Ambulancedienst etc, pero nan mester tuma contacto cu DVG pa asina nan por haya nan invitacion.