E virus variante Delta ta un preocupacion pa autoridadnan di salud local. Despues di analisa e cifranan di un siman atras y awo, a constata cu tin un aumento leve. Si sigui e mesun trend, ta calcula cu pa luna di augustus lo por tin un aumento di 50% di e casonan. Esaki a bini dilanti den un conferencia di prensa di gobierno.
Prome minister demisionario mr. Evelyn Wever Croes a bisa cu e casonan di coronavirus a aumenta den un siman cu 27 caso, cu ta un averahe di 4 caso nobo pa dia. Prome e tabata un averahe di 3 caso nobo pa dia.
Di e 27 personanan contagia siman pasa, a resulta cu 4 di nan tabata vacuna. Un 15% di esnan contagia ta vacuna, y por tin di haber cu e viariante nobo. Si e ta un tendencia cu ta continua, e ta nifica cu 15% di esnan vacuna lo por haya e virus atrobe.
Na hospital tabatin 5 persona interna riba piso di cual 2 ta turista. Y tabatin un persona den Cuido Intensivo y ningun di nan tabata vacuna.
E dos analisisnan aki, segun Prome Minister, ta mustra cu a pesar cu bo ta vacuna bo por haya e virus atrobe, pero bo no ta bira asina malo cu mester wordo interna. “Esaki ta bisa tambe cu mester sigui cuida. Tanten cu e virus ta aki na Aruba, e ta un riesgo pa nos tur, pa esnan vacuna, pero specialmente riesgo pa esnan no vacuna. P’esey nos ta sigui recomenda cuida bo mes y bo famia,” Wever Croes a bisa.
Na final el a bisa cu Gobierno no kier bini cu medidanan bek. Pero e situacion actual no ta hustifica e medidanan tampoco.Y ta kere cu e ciudadanonan mester tuma e precaucion pa evita cu e situacion ta cambia. El a ilustra e situacion di Hulanda y Merca cu tin casonan nobo. E simpel medidanan di precaucion ta evita cu casonan ta aumenta.
Sharlin Koolman di DVG a cuminsa pa bisa cu nan no a spera di mira e aglomeracion cu tabatin den fin di siman, siendo cu e problema di coronavirus no a disparce y tur hende por mira e situacion cu tin na mundo.
El a splica cu den e ultimo siman di luna pasa, a repasa 60 test, cu a wordo haci na Aruba mes. No a descubri ningun caso di Delta, den e siman di 27 di juni pa 3 di juli a bin descubri tres caso Delta den 16 test haci. Den e siman di 4 pa 11 di juli, a haci 25 test di cual 8 a sali positivo pa Delta.
Koolman a trece esaki dilanti pa motibo cu autoridadnan di salud ta considera e variante Delta cu ta hopi mas contagioso cu e variante Alfa (esun Britanico). Mirando e aglomeracion den fin di siman, e chens pa esaki plama y bira mas hopi ta algo cu nan ta preocupa cu ne. “E variante Delta tan a Aruba. Si nos sigui cu e comportacion aki, e lo plama mas na Aruba cu consecuencianan cu nos niun lo kier pasa aden un biaha mas. Un otro ola lo trece su consecuencia. E lo ta tristo si mira cuanto turista ta bek na Aruba, cu a bin pa pasa un vakantie “safe” na Aruba.”
E palabracion di Crisis Team ta cu un biaha pa siman lo suministra e cifranan pa pueblo mes sigui monitor e situacion. Tambe a papia di e vacunacion di hobennan cu a cuminsa den fin di siman. Pero tambe di e conseho nobo di World Health Organization cu ta papia pa tin 85% di e poblacion vacuna, debi cu e variante Delta ta baha e efectividad di e vacunanan existente.