Vanessa Rasmussen a splica di e bishita cu nan a haya di parti di Parlamentario Donny Rasmijn y su team cu a splica AHATA e ley cu lo bay drenta na vigor dia 1 di Januari, 2017. Nan a haci un presentacion riba e pakico di e importancia di e ley cu a wordo aproba pa prohibi saconan di plastick di un solo uzo, cu nan ta haci hopi daño na nos medio ambiente. Directiva di AHATA ta contento cu e iniciativa cu e Parlamentario a logra. Esaki ta e manera cu ta desea yuda pa concientisa pa e movimento, e evento aki cu ta tumando luga na Aruba cu ta cuminsa dia 1 di Januari, 2017, pa asina evita di haci uzo di saco di plastick, cu ta haci daño na nos matanan, pero tambe e bestianan den lama. E ta hopi dificil pa kita nan for di e naturalesa cu nos tin aki na Aruba. Nos tin hopi Hubada y cada biaha cu tin un cleanup, hendenan ta rascanan mes den e esfuerso pa kita nan for di mey mey di e hubadanan of nan no por yega mes na nan. Tur esey tin cu pensa riba dje, prome cu ta acepta un di e saconan di plastick aki na supermercado.
Ta hopi duro pa acepta esaki, pasobra mester forsa pa practica e No. Pa no uza e saco di plastick, sino ta uza un saco reciclabel. Por uza e saco aki na cas tambe, pero ora cu ta bay splica hende na supermercado pakico no tin cu uz’e, nan ta compronde un tiki mas. Sea conciente, pensa riba tur e negativo cu ta bin cu e uzo di saco di plastick y papia cu otro hende tambe y splica nan e pakico ta bon pa no haci uzo di nan mas, segun Rasmussen.
AHATA ta hopi supportive di e esfuersonan aki cu Donny Rasmijn y su team a cuminsa cun’e basta tempo pasa. AHATA lo ta trahando un promocion di concientisacion entre e trahadonan den e sector. Esey ta inclui tambe duna nan muestra di saconan reciclabel cu nan por haci uzo. Informacion di e maneranan cu nan por reduci e uzo di e saconan di plastick, Rasmussen a comenta.