Vanessa Paulina ta describi su mes como un perfeccionista ora ta trata di su pintura, hopi biaha e kier bay bek y haci cambio. Pero locual cu ta lage sinti hopi satisfecho ta ora e ricibi comentario di hendenan cu ta pasa y ta wak e ta pinta. Esaki ta dun’e e push pa sigui y caba cun’e.
Vanessa Paulina ta un artista conoci local y internacionalmente y ta pintando e muraya di Central Madeirense na San Nicolas. “Mi ta hopi contento di ta parti di esaki.” Mirando cu e obra ta net na entrada di caya na San Nicolas. E ta hopi presion y ora cu nan a pidimi mi tabata duda na prome instante, pero despues a dicidi di bay p’e, Vanessa a bisa. “Tambe bo ta haya hopi hende ta bin cu idea y ta puntra pa pinta tal cos of haci esaki. Bo ta purba complace, pero na dado momento mi ta bisa cu e concepto cu ta bin, ta algo grandi y algo di tur hende na Aruba no di San Nicolas so, e ta mustra e isla cultural cu nos ta tambe.
Vanessa mes ta bin di San Nicolas y locual cu e ta treciendo dilanti ta algo cu e ta orguyoso di ta formando parti di dje y ta contento cu porfin algo ta pasando na San Nicolas, el a bisa. Ministerio encarga cu turismo y cultura tambe ta orguyoso di tin e talento local aki contribuyendo na e construccion di nos Cultural and Heritage City cu ta San Nicolas
E tayer cu e tin na San Nicolas ta hiba e tema di kico a inspira e participantenan di locual cu nan a mira of haci na Aruba/San Nicolas. “Tin di nan ta pega cu inspiracion y mi ta yuda nan bisando nan por ehempel cu nos ta e sunrise city. Nan ta haye hopi leuk pa tende splicacacion di e plan cu tin pa San Nicolas. Y por mira cu porfin tin un plataforma pa haya mas bishitante. Ora mi ta pinta hende ta bin na boshi pa saca potret, hende cu a caba di casa ta para saca potret, “it’s a big happening” y mi ta orguyoso di ta parti di dje”, Vanessa a termina bisando.