Comision Renobacion di Parokia Birgen Fatima na Dakota ta organisando un bingo, segun Vanessa Croes-Croes, kende coordinador di bingo. E evento aki lo tuma luga dia 1 di October proximo den Club Caiquetio pa 8’or di anochi. Registracion ta cuminsa for di 6’or di atardi.
E meta di e bingo ta pa por recauda e fondonan necesario pa cuminsa cu renobacion dentro di poco. Ta asina cu ya tur plan ta cla, pero ta faltando e ultimo fase di e suma cu falta pa recauda pa cuminsa cu fase number 1 di e renobacion.
E misa tin hopi parti cu mester wordo renoba, entre otro e dak. Por mira cu den e centor parokial tambe e murayanan ya no ta stabiel. Kiermen por mira rond tambe di misa, e bentananan cu tin cu ser renoba. E imagennan ta asina bunita, pero cu e riesgo grandi, mirando e añanan cu a pasa, e framenan ya no por carga esakinan mas. Ta na su momento pa percura pa nan keda bon cuida, segun Croes-Croes.
E prome fase ta conta cu 1.5 miyon florin. Esey ta un suma grandi. Ta haciendo tur actividad pa por logra recauda esaki, pasobra mester tin tanto na man pa asina ey e renobacion por cuminsa.
Tin dos aña ta haciendo diferente actividad caba, entre otro diferente feria cultural, a haci rifa, a haci movienights. A haci bendemento di rifa di auto. Tambe tin diferente forma spiritual na momento cu por ehempel den temporada di Cuaresma, pueblo ta ofrece un ofrenda y tur esakinan ta maneranan cu ta bay ta recauda fondo durante e añanan cu a pasa.
Tin hopi plan na caminda pa e siguiente añanan, pero actualmente ta toca momento pa e bingo cual ta e siguiente actividad, dia 1 di October proximo.
E carchinan ta obtenibel na misa mes. Despues di tur santo sacrificio di misa durante henter siman por haya carchi. Tambe por yama 7330505 pa carchi, cual ta cerca Vanessa Croes-Croes mes. Un otro number cu por haya carchi cual ta di sra. Vallery Peterson, cual por hay’e na 7355440. Tambe por haya carchi despues di misa di diabierna, diasabra anochi y tambe diadomingo, despues di misa 8’or, 10’or y 6’or di atardi tin carchi obtenibel. Ta encurasha pueblo di Aruba pa haci un donacion, cumpra un bingo, participa.
E premionan di cada wega ta bon premio. Tin diferente sponsor cu a contribui pa haci esaki posibel y ta sigur hopi contento yamando danki na Aruba Trading, cu ta un di e sponsornan y sigur tur e otronan tambe cu di un of otro forma ta duna nan cooperacion. Tur e boluntarionan cu ya a registra pa yuda e dia aki, Croes-Croes a splica.