Departamento di Enseñansa ta informa cu e vakantierooster pa aña escolar / academico 2019-2020 y e ATV-dagen Onderwijspersoneel pa aña calendario 2020 ta aproba pa Minister di Enseñansa, Ciencia y Desaroyo Sostenibel.
E procedura pa yega na vakantieroosters pa scol ta como lo siguiente: Departamento di Enseñansa Aruba (DEA) ta e instancia responsabel pa traha e concept vakantierooster y stipula e ATV-dagen pa “Onderwijspersoneel”. Esakinan ta wordo formula cu e mucha den mente. Entre e liñanan di guia pa formula e rooster tin stipula cu e mucha tin derecho riba 60 dia di vakantie pa aña.
E concept vakantierooster siguientemente ta keda entrega na Dienst Inspectie van het Onderwijs, Directivanan di Scol y SIMAR pa nan por duna nan input. Finalmente e proposicion ta bay pa Minister di Enseñansa di Aruba pa aprobacion.
Na momento cu tin e aprobacion di e Minister di Enseñansa, e vakantierooster oficial ta keda publica y ta comunica esaki na tur e actornan envolvi como tambe na Departamento Recurso Humano (DRH) y instancianan manera SMAC, cu e peticion pa tene cuenta cu e rooster di scol den nan respectivo planificacionnan.
E ATV-dagen pa “Ambtenaren en Gelijkgestelden” di cada aña ta keda stipula pa Departamento Recurso Humano (DRH) y e proposicion ta bay Ministerraad pa aprobacion.
E Dianan Oficial di Fiesta pa cada aña ta keda publica pa Departamento di Labor.
Na momento cu tin e aprobacion oficial esakinan tambe ta keda publica riba e website di Departamento di Enseñansa Aruba [www.ea.aw].
Pa mas informacion por acudi na e website [www.ea.aw] y por sigui e desaroyonan a traves di Twitter y Facebook @EducationAruba.
WWW.EA.AW, WWW.PAPIAMENTO.AW, +297 528 3400, FRANKRIJKSTRAAT 3, ORANJESTAD, ARUBA