Durante di e lansamento di e campaña pa vacunacion contra influenza, Dr. Wilmer Salazar di Directie Volksgezondheid a duna un splicacion di e vacuna y a subraya e importancia pa particularmente esunnan cu ta cay den e gruponan vulnerabel pa tuma e vacuna.
Tin dos tipo di influenza virus, dr. Salazar a bisa, Influenza tipo B ta e tipo cu no ta cambia, pero Influenza A tin como 64 subtipo (entre nan AH1N1, H2N3, etc), cambiando nan structura antigenico, cual ta resulta den e necesidad pa tur aña crea un vacuna nobo. E vacuna contra influenza ta wordo crea tambe di tal forma cu e efecto tin un aña di duracion y tur aña e persona mester tuma su vacuna pa ta protegi contra e subtipo(nan) nobo.
A pesar cu tin 30 mil persona na Aruba cu tin un of mas factor di riesgo pa haya complicacion di influenza of seasonal flu, aña pasa apenas 3.7% di e grupo aki a tuma e vacuna; esaki ta traduci den 4 pa cada 100 persona tabata protegi contra influenza. E falta di proteccion pa cu influenza a refleha tambe den e cantidad di persona cu a bira hopi malo den luna di december 2015 y durante di e “outbreak” na lunanan di apri /mei 2016. E vacuna ta contribui no solamente na prevencion di influenza, pero si e pashent haya influenza mes, e efectonan ta mas suave, Salazar ta agrega.
Dr. Salazar ta enfatisa cu tin hopi informacion disponibel riba Internet, pero no ta tur informacion ta corecto of di fuentenan confiabel y mester pone atencion pa uza e puntonan di referencia corecto ora ta busca informacion, specialmente ora ta trata di informacion medico. P’esey mes Directie Volksgezondheid semper su portanan ta habri pa comunidad consulta tocante di cualkier duda of informacion relaciona cu salud cu nan kier of mester.
Na Aruba y rond mundo 80% di griep ta wordo causa pa e virusnan di influenza, dr. Salazar a splica, sea ta Tipo A of Tipo B. E aña aki e comportacion di e virus a bira mas severo y no ta na Aruba so. Na Europa, Merca, Latino America y Caribe e efectonan tabata asina malo cu hendenan a muri di dje.
E brote na Aruba a conoce mas of menos 800 pashent, hopi persona a keda admiti den hospital. Ocho pashent a fayece. Dr. Salazar a splica cu di e ocho personanan seis tabatin factor di riesgo, incluyendo diabetes, uno tabata un baby bou di un aña y e otro tabata un adulto di entre 30 pa 35 aña sin condicion previamente diagnostica cu por tabata un factor di riesgo. Pa evita un impacto asina fuerte atrobe, dr. Salazar ta pidi pa atencion pa vacunacion, cual ta e unico metodo di prevencion efectivo pa cu influenza.
Ademas di e gruponan di edad – bou dos aña y riba 60 aña, e factornan di riesgo ta inclui malesa cronico manera condicion cardiovascular, cancer, malesa cu ta afecta e pulmonnan y hende muhe na estado, entre otro. Personanan cu ta HIV-positivo y cualkier otro condicion cu ta afecta e sistema inmunologico tambe tin riesgo halto pa haya complicacion severo. E vacuna ta hopi safe, e no tin mucho efecto riba e persona cu ta tum’e. E vacuna pa influenza no ta causa autismo y tampoco problemanan neurologico, dr. Salazar a bisa enfaticamente.
El a añadi cu Guillaen-Barre Syndrome por pasa den 1 of 2 persona pa cada 100 mil of 200 habitantenan den un comunidad, pa motibonan desconoci. Den e caso specifico di vacuna Influenza, 1 caso so lo por presenta pa cada 1 miyon di hende cu a ricibi e vacuna contra influenza, kiermen, e riesgo pa un persona haya Guillaen-Barre despues di vacuna ta hopi abou.
Pa loke ta, entre otro pashentnan cu un sistema inmunologico hopi abou, personanan cu ta tumando ‘immunesupress therapy’ of tin cancer den un estado hopi avansa, e vacuna no lo por tin su efecto protector pa motibo cu e curpa no ta produci suficiente anticurpa pa defende su mes, y no ta un garantia cu e vacuna lo por ta efectivo.
Un bon solucion y e strategia consehabel ta pa e personanan cu ta trata di cerca cu e pashentnan aki tuma e vacuna y asina forma un “barera” di proteccion rond di e pashent.
Si ainda bo tin duda, semper consulta cu bo dokter.