Vacuna Cubano Abdala tin 92.28% di eficacia

Un di e vacunanan Cubano, Abdala, tin un eficiencia di 92.28% pa protege personanan contra e coronavirus nobo, asina fuentenan oficial di e pais Caribense a bisa dialuna. E anuncio ta bini na mesun momento cu a informa di un cantidad record di contagio.

Oficina di medionan oficial y publicacionnan riba rednan social di presidencia a informa cu e mandatario Miguel Diaz Canel a bishita Centro di Ingenieria Genetico y Biotecnologia (CIGB), responsabel di desaroya y produci Abdala, unda cu su director Marta Ayala a inform’e di e porcentahe di eficiencia di e vacuna.

E alcance di e antigeno Cubano ta mas halto di loke cu Organisacion Mundial di Salud ta exigi, cu ta 50% di proteccion pa e por wordo considera un vacuna valido.

Autoridadnan di e pais ta spera den e proximo dianan, resultado di e analisis pa determina e eficiencia di Soberana 02 y Soberana Plus, otro di e vacunanan cu ta den test na e isla, cu ta wordo uza hunto den un vacunacion cu ta inclui dos dosis di e prome y un di esun di dos na final di e ciclo.

Siman pasa a calcula cu e dos dosisnan inicial di Soberana 02– sin conta Soberana Plus den dje, lo brinda un 62% di proteccion.

Cuba ta e prome pais di Latino America cu tin su mesun antigene desaroya y produci pa su propio companianan farmaceutica estatal, un logro singular pa un pais chikito, di poco recurso material, bou di sancionnan di Merca y cu ta pasando den un momento di crisis economico hopi duro.

Abdala y Soberana 02 hunto cu Soberana Plus – e ultimonan aki ta di Instituto Finlay—ta e vacunanan mas avansa di un serie di cinco cu a cuminsa testnan riba sernan humano.

Pa Abdala, cu ta conta cu un programa di tres dosis separa, cada pasa 14 dia, a cuminsa cu su testnan clinico di fase 1 na december riba 132 persona. Despues a pasa pa Fase II cu 660 boluntario y Fase III cu 48.000 persona vacuna, cu a demostra e producto como uno eficaz y sigur.

Den conferencia di prensa algun dia prome cu tabata sa e resultadonan, e expertonan a menciona prensa cu aunke nan no tin un cifra den porcentahe exacto riba su efectividad, nan ta sigur cu Abdala y Soberana 02 ta valido pa tur e variantenan di COVID-19.

Tin un aumento di casonan di COVID-19 aworaki na Cuba y Gobierno a bisa cu nan lo mester tin 70% di e poblacion vacuna pa augustus awo, mientras cu ta cuminsa un estudio riba muchanan di tres pa 18 aña, cual grupo a exclui den e inmunisacion anterior.

Autoridadnan a raporta un record di 1561 caso pa un total di 169.365 contagio desde maart, 2020. Un total di 1170 persona a fayece di COVID.

Comments

comments