Contrario na locual a ser publica na algun radio emisora y den corant Solo di Pueblo, Serlimar oficialmente ta declara cu e publicacion di e vacatura en cuestion, manera den tur compania, tin unicamente como meta pa yena un cupo di trabao desocupa cu tin na Serlimar. Esaki ta di suma importancia pa e compania estatal por opera y cumpli cu su servicionan. No ta correcto ni husto pa cambia e contexto di esaki mirando cu ta e compania y tur su empleadonan ta wordo perhudica na momento cu trece insinuacionnan erroneo den prensa.
Serlimar pa e motibo aki ta desmenti categoricamente e argumentonan treci dilanti den cierto medionan di comunicacion cu lo a forza un empleado di retira di su puesto. Serlimar ta traha segun reglas y no tin espacio ni tempo pa practicanan di intimidacion, manera algun media ta insinua.
Hecho ta cu Serlimar a publica un vacatura pa un puesto unda cu tur candidato cualifica ta bon bini pa aplica pa e funcion aki pa sigui engrandece e compania y su servicionan tanto publico como comercial. Lo encamina e proceso di seleccion. Finalmente, e mihor candidato pa e compania lo wordo scogi.