E miembronan di Aruba Timeshare Association a reuni pa nan lunch meeting mensual den e ballroom nobo di La Cabana Beach Resort & Casino, cu representantenan di mayoria propiedadnan vacacional di e isla, como tambe varios socio strategico cu a asisti.
Presidente interino di ATSA, Andy Osborne, a duna bon bini na e miembronan y socionan prome cu e la inaugura e reunion oficialmente cu aprobacion di e notulanan di e reunion cu a tuma luga na juni 2018.
Den su saludo, Osborne a informa e forum cu e lo actua como e President interino te cu final di e aña di e asociacion, es decir december 2018, ora cu e ta planea pa renuncia di e directiva.
Su nombramento como presidente interino a bini den cuadro di e renuncia recientemente di Ursell M. Arends, Operations Manager di La Quinta Beach Resort. Den su carta di renuncia, Arends a comparti su opinion cu su carera politico conhunto cu su presidencia di ATSA no lo beneficia e asociacion. Consecuentemente, e la tuma e decision pa renuncia, gradiciendo tur persona pa nan colaboracion y e apoyo brinda na dje durante e ultimo dos añanan.
Osborne a anuncia cu ATSA ta compronde y respeta e decision di Arends pa renuncia e presidencia den e circunstancianan ya menciona, y e la gradici’e pa su esfuersonan, sabiendo cu ATSA ainda por conta cu e respaldo di Arends ora ta necesario.
E forum a manda nan miho deseonan pa Arends su futuro esfuersonan – politicamente, personal y profesionalmente.
Osborne a recorda e forum tambe cu e articulonan di e asociacion ta rekeri un lista di candidato pa e directiva cu lo wordo anuncia na e reunion di november, y cu ATSA lo ta en busca di tres (3) candidato pa e posicionnan di directiva.
Den e reunion a elogia e iniciativa anual di ricibi studiantenan di EPB Oranjestad y EPB St. Nicolas na Amsterdam Manor, Costa Linda, Casa del Mar, La Quinta, Divi Resorts, Paradise Beach Villas, Playa Linda, Tropicana y La Cabana entre dos dia consecutivo. E iniciativa anual ta pa expone aun mas e industria hotelero local bao nos hobennan, asina plantando simiya di awo caba pa futuro posibilidadnan di empleo.
Cu e Gerente General Farida Mansur retirando di su posicion na Aruba Beach Club despues di 31 aña fructifero, e forum a wordo introduci na Pam Cordell, Senior Vice Presidente di Operations pa NHG, National Hospitality Group, cu recientemente a asumi e responsabilidad di e maneho di Aruba Beach Club.
Cordell a comparti cu su compania tin e placer pa agrega Aruba Beach Club na su cadena di 72 propiedad popular, mayoria di nan timeshare hotels.
Pedro Vargas cu recientemente a wordo nombra Gerente General di Marriott Ocean Club tambe a introduci su mes na e forum, y a anuncia cu e lo ta participando regularmente den e proximo reunionnan di ATSA representando su hotel.
E reunion a duna un actualisacion cortico tocante e colaboracion binidero di CEDE Aruba y ATSA cu e proposito di recauda fondo pa causanan local social.
Entre otro noticia cu a wordo comparti: Paradise Beach Villas a caba di reintroduci un programa caminda cu cosnan cu turista y miembronan laga atras ta wordo dona na Fundacion Pa Nos Comunidad.
E representante di ATSA na e Tourism Product Enhancement Fund a informa cu mientras e presupuesto di gobierno pa e aña a wordo aproba, tin algun proveedornan di servicio importante manera Sea Solutions y Clean Master cu ainda ta pendiente pa nan pago.
E disputa di ATSA tocante algun di e cargonan di beach policy ainda ta pega na corte y ta spera cu nan lo wordo resolvi den e proximo lunanan.
La Cabana Beach Resort & Casino ta orguyoso pa show nan ballroom nobo como un sala di conferencia y sala di banquete.
Aruba Beach Club a informa cu e hotel ta completamente recupera di e olanan grandi cu tormenta tropical Kirk a trece cun’e na september ultimo, y nan lo ta construyendo un muraya pa evita futuro dañonan cu lama por causa.
Playa Linda Beach Resort continuamente ta actualisa y ta repasando nan ‘to-do list’ cual ta inclui bentana nobo, renobacion di bañonan, muebles y aparatonan pa cushina.
Costa Linda ta raporta reviewnan excelente pa e Frangipani suites cu awo ta sold out.
Caribbean Palm Village Resort ta instalando brackets pa nan panelnan solar nobo.
Marriott Surf Club y Ocean Club ta raporta inversionnan grandi, cu un Sales Gallery cla pa e high season di 2018-2019, un piscina cu superficio nobo, un lobby renoba pa Ocean Club y renobacion completo pa Surf Club. Ocean Club tambe a haya un concepto moderno di cuminda na e restaurant nobo Malmok.
Paradise Beach Villas lo ta celebrando nan di 25 aniversario bao di e capa di Bougainvillea.
Osborne a gradici La Cabana Beach Resort & Casino pa organisa e evento perfecto incluyendo un delicioso lunch saludable, y a suspende e reunion.